ИЙЭ СЫЛЫНАН, ИЙЭ КҮНҮНЭН ИЙЭЛЭРИ ТУОЙАБЫН!
ИЙЭ СЫЛЫНАН!
Ийэ сыла! Эйэ сыла!
Олус истиҥ өйдөбүл!
Сылы быһа Ийэ сыла
Дьикти сылбыт үүннэҕэ!
Ийэ суоҕар дьиэ тута
Иһийбиттии иччитэх,
Эйэ суоҕар сир үрдэ
Сибэккинэн симэммэт.
Ийэ тыына дьикти кыах
Халыҥ хахха, суон дурда!
Эйэ эрэ олоххо
Дьолу түстүүр сүдү күүс!
Ийэ күнэ, Ийэ сыла
Турукпутун тупсардын!
Ийэ эрэ халлааҥҥа
Сулус буолан сыдьаайдын!
Полина-Победа
2022с.
ААТА КЫНАТ ҮҮННЭРДЭ
/Ф.Н.Малгинаҕа ананар
Биэс бырааттыы Малгиннар
Барбыттара сэриигэ,
Төннүбэттии толооҥҥо
Тохтубута хааннара.
Хара сурук сыллата
Арахпакка кэллэҕэ,
Харах уута даҕаны
Кэлбэт гына уоллаҕа.
Ийэлэрэ барахсан
Көҥдөй көхсө хапсыйан
Кыаҕа баарын тухары
Кэтэстэҕэ аартыгы.
Тахсан барбыт сирдэрин
Манаатаҕа күннэтэ,
Биирэ эмэ кэлиэ диэн
Таҥастарын кууртаҕа.
Бөртөлүөккэ бу Ийэ
Сырдык аатын биэрдилэр,
Сахалартан биир ийэ
Аата кынат үүннэрдэ!
Куйаардары кэрийэн
Сэрии буолбут сириттэн
Уолаттарын куттарын
Булан көрсөр кыахтанна!
Полина-Победа
Уус-Алдан
2022с.
ИЙЭ ДЬОЛО
/Т.С.Николаеваҕа ананар/
Бэрэсидиэн ийэтэ
Буолуом эрэ диэбэккэ
Күүстээх үөрэх быыһыгар
Төрөттөҕө Айсенын.
Төрүччүтүн мэйиитэ
Бэриллибит уолчаана
Кыратыттан биллибит
Үөрэх диэни ылара.
Үөрэх, үлэ быыһыгар
Оҕолорун дьарыктаан
Төрдүөннэрин такайан
Сөптөөх суолга салайбыт.
Күүстээх дьаныар түбүгэ
Үтүө буолбут түмүгэ,
Саха сирин салайар
Саарын үүнэн тахсыбыт.
Ити Ийэ сүрэҕэ!
Ити Ийэ билиитэ!
Орто сиргэ ситиспит
Дьиҥнээх дьоло буоллаҕа!
Дьоллоох оҕо саастаныы —
Ийэ киһи түбүгэ!
Үтүө киһи үүнэрэ —
Дьоллоох кырдьыы төрүөтэ!
Полина-Победа
Уус-Алдан
2022с.
ГЕРОЙ ЫАННЬЫКСЫТ
/А.С.Копыринаҕа ананар/
Ыанньыксыт да депутат
Үлэ үөһүн дьонноро,
Өрөбүлэ суох түбүк
Дьиэҕэ түптээн олорбот.
Түгэх сиртэн Даалыттан
Настаа Дьоруой буолбута!
Хотон диэнтэн Москуба
Чугас дэммит туоһута.
«Уйгу сирэ Уус Алдан»
Настаа курдук дьоннортон
Ырыалара ылланан
Ыллык устун тарҕанна.
«Соло тиийбэт» диэбэккэ
Санаабытын сиппитэ,
Кыыһы иитэ ылбыта
Ийэ аатын сүкпүтэ.
Борбуйдарын көтөҕөөт
Батыстаҕа ийэтин,
Билэн-көрөн, үөрэнэн
Бэтэринээр буолбута.
Ийэ киһи итинник
Сатабылын тиэрдээччи,
Оҕотугар сүрэҕэ
Өрүү чугас, иһирэх.
Ийэ, оҕо биир тыыҥҥа
Иннэлээх сап курдуктар,
Олохторун ситимэ
Уһун оннук ол саптыы.
Полина-Победа
Уус-Алдан
2022с.
БИЛИНИЭҔИҤ
/Ф.В.Габышеваҕа ананар/
Крым кэрэ сиригэр
Феодосия куорат баар,
Үөһээ Бүлүү ыалыгар
Феодосия кыыстаахтар.
Бүтүн куорат аатынан
Ааттаммыта таайдаҕа,
Саха сирэ бүттүүнэ
Билэр аата үүннэҕэ.
Сырдык үөрэх салаатын
Салайдаҕа өр кэмҥэ,
Талан ылбыт идэтин
Кыайа тутта олоҕор.
Улуустары барытын
Билэн, көрөн, быһааран
Хааччыйдаҕа кыаҕынан
Хаалбыт, маппыт суох буолуо.
Маннык курдук дойдуга
Бэриниилээх дьоннору
Билиниэҕиҥ, билиэҕиҥ
Махталбытын тиэрдиэҕиҥ!
«Оҕом туһа» диэн баран
Омук сирин булбата,
Кыаҕын билэн тас сиргэ
Барбатаҕар БАҺЫЫБА!
Полина-Победа
Уус-Алдан
11.11.2021с.
ГИТАРАЛААХ САША
/М.И.Самсоноваҕа ананар/
Ийэ эрэ сүрэҕэ
Тобуллаҕа бу маны,
Үйэлэргэ оҕотун
Үйэтиттэ дьэ чахчы!
Күҥҥэ көрбүт көмүһүн
Көмүс талаан уолчаанын
Харах уутун хаһыйан
Бэлэх уунна бар дьоҥҥо!
Хаҥалаһын сиригэр
Айыы уола Сашабыт
Туруо төрүт буоругар
Гитаратын кытары.
Нуучча уола Алеша
Сэбиэскэйбит саллаата
Болгария сиригэр
Турар Кыайыы туоһута!
Силлиэ, ардах да хоппот
Махтал баарын туоһулаан
Туруохтара үйэҕэ
Эдэр кэрэ мөссүөннэр!
Арай өйгө ардыгар
Нарын матыып кутуллуо,
Салгын устун тарҕаныа
Айыы уолун ырыата…
Полина-Победа
Уус-Алдан
2022с.