Полина-Победа: «Сүүс чороон»

Ааптар: 
Бөлөххө киир:

Туймаадабыт түһүлгэтигэр 100 чороонноох эр дьон киирэн  хаамыахтаахтарын дьиибэргиир да, өйдөөбөт да киһи элбэх.
Туох эмэ саҥа сүүрээн киирээри гынна да төттөрү эрдээччи элбиир.
Мин саҥа сүүрээни сөбүлүүбүн, тэҥҥэ барсабын. Санаабын хоһоонунан этинэбин.

СҮҮС ЧОРООН

Чороон тугу кэпсиирий?
Чороон кэпсиир элбэҕи:
Саха сэмэй майгытын,
Мас хайдыбытыныы көнөтүн.

Хатыҥ мастыы бөҕөтүн,
Субатыныы сырдыгын,
Далбар хотун кэриэтэ
Быһыы-таһаа чочуонай.

Симэхтэрин симэммит
Хатыҥ мастыы сиэдэрэй,
Талаан тарбах чорооҥҥо
Сиэдэрэйдээн түһэрбит.

Куруһуба оһуору
Кыһар маастар чорооҥҥо,
Сиэри-туому тутуһан
Мындыр ойуу түһэрэр.

Үрүҥ Тунах ыһыахха
Алгыс тыллаах кымыһы
Саха кутар чорооҥҥо,
Айах тутар ыалдьыкка.

Сүүс чороонноох эр дьоммут
Саҥа сүүрээн киллэриэ,
Саҥа тыыны ылынан
Сайдыа дойдум сүүс төгүл!

Полина-Победа
14.06.2022с.

+1
0
+1
0
+1
0
+1
0
+1
0
+1
0
+1
0