Саха бастакы поэтессата Варвара Потапова Ньурба улууһун Сүлэ нэһилиэгэр 1946 сыллаахха ыам ыйын 13 күнүгэр күн сирин көрбүтэ. Бүгүн кини төрөөбүтэ 75 сыла бэлиэтэнэр.
Варвара Потапова саха поэзиятыгар дьахталлартан бастакынан лирика тиэмэтин киллэрбит суруйааччынан билинэллэр.
Уус Алдантан Полина Находкина-Победа Варвара Потаповаҕа анаан суруйбут «СҮППЭТ ДЬЫЛҔА» диэн хоһоонун билиһиннэрэбит.
Уһун суһуох Варвара
Нуучча омук номоҕо,
Саха кыыһа Варвара
Кылгас олох, суһуох суох.
Кылгас буоллар даҕаны
Аатын алмаас сүкпүтэ,
Кылгас буоллар даҕаны
Биллэрбитэ бэйэтин.
Ньурба кыыһа Варвара
Дьахталлартан маҥнайгы
Саха самэй тапталын
Аһаҕастык туойбута.
Орто сирин олоҕор
Үөһэлэртэн суруллан
Христостуун тэҥ сааска
Барбыттара бу сиртэн.
Барбыт сүппэт дьылҕатын
Быһаардаҕа талаана,
Үйэлэри уҥуордаан
Варя аата ааттаныа!
Полина-Победа
Уус Алдан
2021с.