Кэпсээннэр

Полина-Победа: Поэзия күнүнэн!

Дууһаны, туругу тупсара, санааны сайа этинэ хоһооҥҥо холбоһуу — бу дьол биир көрүҥэ диэн этэр биһиги уопсастыбаннай кэрэспэдьиэммит, Уус Алдан улууһун олохтооҕо Полина Находкина-Победа. Бүгүн дойду үрдүнэн Поэзия күнэ бэлиэтэнэр.

 

АЛҔАС ДУУ…

Айар муза абылаҥ
Аанын алҕас астым дуу?
Туойар тойук тыллары
Тобулбакка тистим дуу?

Ыра санаа ыллыгар
Быстах киирэн хаамтым дуу?
Ымыы чыычаах ырыатын
Ымсыырбычча туойдум дуу?

Хоһоон хонор сиригэр
Биирдэ хонуох буолбуппун,
Билбэт күүстэр өрүүтүн
Күөйэ сылдьар курдуктар.

Сатаан туойбат турукпун
Туора харах тутуһуо,
Аахпыт эрэ барыта
Алҕастарбын аахсыһыа.

Сэргээн ыла түстэллэр
Сэргэхсийиэ мин музам,
Сирбэт эрэ буоллаллар
Сэмээр үөрүө мин дууһам.

САХА ДЬАХТАРЫН АНЫГЫ СЭТТЭ МЭТИРИЭТЭ

1 мэтириэт

Быт диэни билбэтэх
Хоһоҕоттон куоппут
Холоҥсону кыайбыт
Арамаат сыттаах
Аныгы дьахтар
Духуута, кириэмэ
Туумба тухары,
Дурууга,пантиҥҥа
Дууһатын туттарбыт,
Кыһаллан мүһэллэн
Кырдьары кыйдаабыт,
Эмтиэкэ күүһүнэн
Эдэрин эргиппит.
Балаҕан диэни
Былааннаан билбэтэх,
Алааһы аҥаарбат,
Сэргэни сэҥээрбэт,
Өтөҕү өҥөйбөт.
Тиэргэниттэн тэйбит,
Тас дойдунан дайбыт,
Импортка иҥмит
Омугу ордорбут.
Сахабыт сирин
Саҥа дьахтарын
Маҥнайгы көстүүтэ
Маннык буолбут.

2 мэтириэт

Иккиспит ис киирбэх
Үргэммит хаастаах,
Үрдүк хобулуктаах
Үтүөмсүк дьахтар.
Өтөрү көрбөхтөөн,
Өрүүтэ тыыммахтаан
Кэпсиирин кэтэппэт,
Көрбүтүн кистээбэт,
Итэҕэс-быһаҕас
Эппэт идэлээх.
Таһынан дьалкыйыах
Таһыччы саҥалаах,
Баһаарга алтыһан
Бардамсык майгылаах,
Ырыынакка туран
Ыһытыы үөрэммит,
Атыыһыт аатыран
Айдааны сатаабыт,
Эргиэмсик идэлээх
Этиһиик да дьахтар.

3 мэтириэт

Үһүспүт бэйэтэ
Үспүйүөн үтүөтэ.
Үчүгэй көстүүтүн
Үргүтэ үүрдэрбит.
Тас талыы бэйэтин
Таҥнары таттарбыт.
Күнүүһүт идэҕэ
Күтүрү астарбыт,
Күлэрин умнубут.
Ыллыырын бырахпыт,
Хайыта тыыттаран
Ханньары таттарбыт.
Кэргэнин уорбалаан
Уордайа уостубут,
Детектив кэпсэтэн
Кэтэтэр буолбут.
Хаартыска, кассета
Хомуйсан сырсыбыт,
Кэлэрин, барарын
Киһинэн кэтэппит.
Сериал ыарыыта
Дьиҥ чахчы сыстыбыт.
Бөрүкү көрүҥү
Бэйэтэ таллаҕа.

4 мэтириэт

Төрдүспүт ураты
Таһыма таһыччы,
Оҥоруу муруннаах
Тупсарыы түөстэрдээх,
Тарбаҕын аайытын
Биһилэх килбэҥниир.
Килиэйдээн сыһыарбыт
Уп-уһун тыҥырах,
Кэтэрдии кыламан
Уһуна омунуон!
Сайыҥҥы лыах курдук
Сапсынар көтүөхтүү,
Окуоллаах уостара
Оҕолуу толлойбут.
Сиикэй эт уоппуттуу
Ыраахтан кытарбыт.
Сымыйа сирэй дуу,
Дьиҥнээхтии кэрэ дуу-
Дьүһүнэ хайдаҕын
Бэйэтэ да билбэт,
Саҥарар саҥата
Сымыйа былаастаах,
Кинини эрэммит
Иэдэйиэ олоҕор.

 

5 мэтириэт

Бэһиспит бэрдимсик,
Бэйэтин билиммит,
Хоҥор хаас кэриэтэ
Хоноччу туттубут,
Халыҥнаах харчыга
Хараҕын хатаабыт,
Үллэҥниир ол үпкэ
Үҥэргэ үөрэммит.
Доллар диэн кумааҕы
Дууһатын уйгуурпут,
Евро диэн харчы
Иҥсэтин көбүппүт.
Харчылаах киһилиин
Ханыылаан хаамсыбыт
Бартыбыал туппуту
Батыһа сатаабыт.
Сыллаһаат сытыспыт,
Уураһаат утуйбут-
Билиэнҥэ барбытын
Билбэккэ да хаалбыт
Попугай кэриэтэ
Хаайыллан олорбут,
Кэлэрин-барарын
Киһинэн кэтэппит.
Кэнэҕэс кэмсинэн
Ыгдайа ытаабыт,
Ол өҥнөөх доҕорун
Өстөөххө холообут.
Ытаан да ыллаан да
Ким истиэй кинини?
Хамнастаах харабыл
Хамнаппат ханна да.

 

6 мэтириэт

Алтыспыт ас диэҥҥэ
Аккааһын биллэрбит
Баҕаран бааммыт,
Ымсыыран ырбыт.
Уҥуохтаах тириитэ
Курдары көстүбүт.
Уҥуоҕун иһигэр
Силии да мэлийбит.
Ырыган буолар диэн
Муода дии санаабыт.
Уойбуту-топпуту
Уродка холообут.
Былааччыйа диэни
Быыра бырахпыт.
Стрейч ыстааҥҥа
Ыбылы ылларбыт,
Булууһа диэн таҥас
Акаары аатырбыт,
Типигы-иипиги
Турунан таҥныбыт.
Кулгааҕын эргиччи
Тэһитэ үүттэппит,
Киинигэр кытары
Ытарҕа иилиммит
Кэлигэс-барыгас
Кыыс оҕо кылаана,
Биир сиртэн булбаккыт-
Биэс аҥы хайытыа.

 

7 мэтириэт

Сэттиспит сибэтиэй
Сибэкки кэрэтэ,
Өйдөөх үтүөтэ,
Үөрэхтээх туйгуна.
Кэпсэтэр-сэлэһэр
Солото өрүү суох,
Компьютер-үлэтэ,
Олоҕо, ыарыыта.
Киэһээтин дьиэтигэр
Хоһуттан тахсыбат,
Интернет иһигэр
Тапталын көрдөнөр.
Олохпут хаамыыта
Тургэнэ олуһуон!
Урукку мэтириэт
Оннуттан суох буолбут.
Аныгы үйэни
атыттар айаллар,
Сарсыҥҥы мэтириэт
Саҥаны көрдөрүө.

 

Полина-Победа, Уус Алдан

Хаартыска: https://www.sostav.ru

1
0
Telegram @edersaas20

Добавить комментарий