/Киһи төбөтүгэр баппат быһылаантан үөскээбит хоһоон/
Маннык курдук акаары
Боппуруоска кэтиллиэм
Диэбэтэҕим олохпор, Киирбэтэҕэ өйбөр да.
Элбэх эдэр дьоннорго
Билии биэрэ, тириэрдэ
Үлэтигэр тиэтэйэ
Баран иһэн мэлийдэ.
Хаарыаннаахай киһини,
Хайдах курдук мэйиини
Кэрбии, ыстыы тыыннаахтыы
Кэбилээтэ ыт үөрэ?!
Киһи эрэ барыта
Куйахата күүрдэҕэ!
Тэбэр сүрэх бу дьайтан
Бөтө-бөтө тэптэҕэ…
Тулуйбата туругум,
Өйүм-санаам уйбата,
«Киһи дуу? Ыт дуу?»-
Дууһам испэр кыланна.
Өбүгэбит, дьоммут да
Ииттэллэрэ ыт диэни,
Сөбүн көрөн дьаһайан
Бэйдиэ ыыппат этилэр.
Хайдах курдук най барыы,
Бил баһыттан сытыйыы!
Хаалтыс, көстүүм кэппиттэр
Хахха-дурда буолбаттар.
Ыт дуу? Киһи дуу?
Ыйааһыҥҥа турдубут
Биэстээх оҕо даҕаны
Биэриэ этэ эппиэти.
Полина-Победа
Уус Алдан
29.12.2021 с.