«Аалай уоттаах сулуһум,
Айар-тутар суолдьутум —
Эн комсомол, эн комсомол!
Эн комсомол — мин дьолум!» — бу ырыа тыллара бу күннэргэ урукку кэм дьонугар уостан түспэт буолуохтаах.
edersaas.ru, Полина-Победа
Көлүөнэм дьонун, уруккуну сэргиир-сэҥээрэр дьону барытын Саха хомсомуолун күнүнэн эҕэрдэлиибин!
Мин хомсомуолга үстэ киирбитим. Ол
остуоруйата бэйэтэ биир туспа кэпсээн.
Бэйэм Кыайыы күнүгэр төрөөбүт буоламмын патриотическай ырыалары, темалары сөбүлүүбүн. Ол иһин да буолуо олох эдэр эрдэхпиттэн Ленин төбөлөөх значоктары мунньан саҕалаабытым. Уонна ийэм наһаа сөбүлүүр буолара: иистэнэр малларыгар Ульянов төбөлөөх октябрёнок, пионер, хомсомуол значоктарын мэлдьи ууруна сылдьара. Наһаа сөбүлүүрэ, дэҥ-дуҥ ылан имэрийэн көрөрө уонна төттөрү уурара. Арааһа күүһүгэр күүс эбинэр быһыылааҕа.
Онтукайым кэлин кырата суох коллекция буолбута (420 устуукаҕа тириэрдибитим. Сороҕо, хомойуох иһин, уокка былдьаммыта). Ол да буоллар 300-кэ баар билигин.
КЭРЭКЭ КЭМНЭРБИТ
/Саха хомсомуолун 100 сылыгар ананар/
Олохпут бу сиргэ
Өрүүтүн таабырын,
Сарсын туох күүтэрин
Билбэппит, таайбаппыт.
Сокуоммут хараҕа
Саахымат дуоската —
Уруку кумирбыт
Бу бүгүн өстөөхпүт.
Бэл улуу Ленины
Үөхтүбүт-мөхтүбүт,
Бүгүҥҥү бу күҥҥэ
Идеал суох буолла.
Сирдээҕи сулуспут
Халлааны баһыйда,
Ыллаабыт, суруйбут
«Сулуспун» дэниннэ.
Күүрээннээх күннэрбит
Күрэнэн хаалбыттар,
Харчыга хаамабыт,
Харчынан кэмниибит.
Комсомол күннэрэ,
Өктөөп, Маай үөрүүтэ
Ньам курдук буолуо диэн
Өйгө да суох этэ.
Ол эрэн уруку
Комсомол сүрэхтэр
Төлөннөөх кэмнэри
Умнубат эбиппит.
Кэрэкэ кэмнэрбит,
Комсомол саастарбыт
Күүскэтик, ааспаттык
Сөҥмүттэр сүрэххэ.
Полина-Победа
Уус Алдан
2020с.