Билигин өрөспүүбүлүкэҕэ “Пушкин каартатын” 24 тыһыынча кэриҥэ киһи туһана сылдьар. Барыллаан ааҕыынан, Саха сиригэр 110 тыһыынчаттан тахса киһи бу каартанан туһаныан сөптөөх.
— Судаарыстыба 14-22 саастаах ыччаты култуура эйгэтигэр сыһыараары, ону тэҥэ, култуура тэрилтэлэригэр күүс-көмө буолаары харчы биэрэр. Эдэр киһи сыл устата 5 тыһыынча солкуобайдаах суумаҕа (киинэҕэ – 20 тыһыынча солкуобай, тыйаатырдарга, мусуойдарга, быыстапкаларга – 3 тыһыынча солкуобай) култуура тэрилтэлэригэр сылдьыан сөп. Ити биһиги эйгэбитигэр киирэр дохуоппут буолар. Ону сөптөөхтүк туһанан, мин санаабар, бу бырайыак ыыра кэҥээн иһиэҕэ.
Өрөспүүбүлүкэҕэ эспиэрдэр сэбиэттээхпит. Ый аайы ханнык тэрээһиҥҥэ бу каартанан сылдьыахха сөбүн уларытан, кэҥэтэн биэрэбит. Холобур, бу ыйга ырыаһыт Полина Гагарина кэнсиэригэр “Пушкин каартатынан сырытыннарыҥ” диэн көрдөспүттэрэ. Ону биһиги сөбүлэспэтибит, тоҕо диэтэр, бу каартаны шоу-кэнсиэртэргэ бараан кэбиспэккэ, бэйэбит түмэллэрбит, тыйаатырдарбыт дириҥ ис хоһоонноох култуурунай тэрээһиннэригэр ыччат сырыттын, сайыннын диэн санаалаахпыт, — диэн СӨ култуураҕа, духуобунай сайдыыга миниистирэ Юрий Куприянов этэр.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru