Бырамыысыланнас өрөспүүбүлүкэҕэ бу сылга түмүктэрин туһунан өрөспүүбүлүкэ баһылыга Айсен Николаев хайдах сыаналаабытын манна ааҕыҥ.
Аҕыйах хонуктааҕыта СӨ Ил Дархана Айсен Николаев “Саха” НКИХ тэлэбиидэнньэтинэн ый түмүктэрин таһаарар интервьютугар өрөспүүбүлүкэҕэ бырамыысыланнаска эмиэ түмүктэр үчүгэйдэрин тоһоҕолоон бэлиэтээбитэ. Ол курдук, бырамыысыланнас оҥорон таһаарыыта 22 бырыһыан улааппыт. “Нежданинскайдааҕы” хайа-байытар кэмбинээтин бырайыага өрөспүүбүлүкэ социальнай-экэнэмиичэскэй сайдыытыгар үтүө дьайыылаах буоларын эппитэ.
— Бырамыысыланнас үүнүүтүн көрдөрүүтэ эмиэ үчүгэй. Дойдуга бастыҥнартан биирдэстэринэн буолабыт. 10 ыйдааҕы үлэ түмүгүнэн 19 быр. үрдээтэ (7,5 быр. этэ). Бу сыл түмүгүнэн бырамыысыланнас оҥорон таһаарыытыгар ковид иннинээҕи 2019 сылы куоһардыбыт. Бу ситиһиилэр Саха сирин олохтоохторун дохуотугар дьайыахтара. Бүддьүөт дохуоттаах чааһын элбэтии өттүгэр. 2022 сылга бүддьүөт – 265 млрд солкуобай, итинтэн 117 млрд солк. – бэйэбит тус дохуоппут. 2018 сыллаахха 117 млрд солк. бэйэ дохуоттаах буоллахпытына, 2018 сылы кытта тэҥнээтэххэ, бу көрдөрүү 34 млрд солк. улаатта. Бу өрөспүүбүлүкэ экэниэмикэтин улахан үлэтин түмүгэ. Кыһыл көмүһү хостооһуҥҥа тохтоотоххо, кыһыл көмүһү хостооһун 40 т куоһарда. Устуоруйаҕа аан бастаан маннык ситиһилиннэ. Билигин” Полиметалл” хампаанньа фабриканы тутууну түмүктүүр, бу 6 т итэҕэһэ суох кыһыл көмүһү биэриэхтээх. Бу өрөспүүбүлүкэ уонна оройуон бүддьүөттэригэр кырата суох көрдөрүүлэр. Маны сэргэ “Полиметалл” олохтоох каадырдары үлэлэтиигэ дьулуһар, — диир өрөспүүбүлүкэ баһылыга Айсен Николаев.
Бэлэмнээтэ Женни Стрюкова.
Хаартыска: интэриниэттэн