Уопсастыба

«Полиметалл» 430 киһини үлэнэн хааччыйда

«Полиметалл» «Олохтоох каадыры — бырамыысыланнаска» бырайыагынан 430 киһини үлэнэн хааччыйда.

СӨ Бырабыыталыстыбатын бэрэссэдээтэлэ Андрей Тарасенко эрэгийиэҥҥэ үлэлиир бөдөҥ тэрилтэлэри кытта олохтоох нэһилиэнньэни үлэнэн хааччыйыы боппуруоһугар куйаар ситиминэн мунньахтаата.

«Олохтоох каадыры — бырамыысыланнаска» өрөспүүбүлүкэтээҕи бырайыагы олоххо киллэрии туһунан СӨ нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин эбээһинэһин толорооччу Елена Калашникова иһитиннэрдэ. Кини бырайыакка кыттар тэрилтэ ахсаана элбээн түөрт уон бииргэ (41) тиийбитин эттэ:

  • 28 бырамыысыланнай тэрилтэ,
  • 9 суол-иис хаһаайыстыбатын уонна тутуу салаатын тэрилтэлэрэ,
  • 4 энергетикэ уонна тырааныспар тэрилтэлэрэ.

«Полиметалл» хампаанньа Саха сиринээҕи филиалын дириэктэрин персоналга уонна социальнай боппуруостарга солбуйааччы Наталья Чепурнова, бырайыак иитинэн хампаанньа 430 киһини үлэнэн хааччыйбытын бэлиэтээтэ.

«СӨ нэһилиэнньэ дьарыктаах буолуутун судаарыстыбаннай кэмитиэтин кытта бииргэ биһиги олохтоох дьону үлэҕэ ылар соруктаах анал бырагырааманан үөрэтиини олоххо киллэрэбит. Нежданинскайдааҕы ГОК үлэлииргэ 300 чугаһыыр саҥа үлэ миэстэтин тэрийии былааннанар«, — диэтэ Наталья Чепурнова.

СӨ Үөрэх министиэристибэтин уонна нэһилиэнньэ дьарыктаах буолуутун судаарыстыбаннай кэмитиэтин кытта бииргэ үлэлээһин чэрчитинэн, былырыын өрөспүүбүлүкэ бары кэриэтэ оройуоннарыгар күһүҥҥүттэн дьарыга, үлэтэ суох нэһилиэнньэҕэ саҕаламмыт кылгас болдьохтоох куурустарга 120 киһи үөрэммит. Маныаха «Полиметалл» көҕүлээһининэн,  12 араас идэҕэ сүүстэн тахса киһи квалификацияламмыт. «Бу Томпо оройуонугар фабрикаҕа наада буолар идэлэр: сушильщиктар, фильтровальщиктар, флотатордар, миэлиҥсэ машинистара, конвейер машинистара, бункеровщиктар«, — диэн быһааран биэрэр Наталья Чепурнова.

«Полиметалл» иһитиннэрэринэн, эксээмэннэр түмүктэринэн куурустартан 42 истээччи Хабаровскай кыраайга уонна Магадан уобалаһыгар обогатительнай фабрикаларга стажировкаламмыттар. Оттон билигин кинилэр Южно-Верхоянскайдааҕы хампаанньаҕа үлэлииллэр. «2022 сылтан биһиги Дьааҥы оройуонугар Прогноз учаастагар хайаҕа аһаҕас үлэҕэ  бэлэмнээһини саҕалыыбыт. Былаһаакка иһинээҕи суолу тутуу уонна учаастакка инфраструктурнай эбийиэктэри тутуу ыытыллыа. Итинэн сибээстээн, 170 үлэ миэстэтин тэрийии былааннанар, биллэн турар, Дьааҥы олохтоохторугар болҕомто ууруллуо«, — диир дириэктэри солбуйааччы. Наталья Чепурнова СӨ миниистирдэр кабинеттарын салайааччытыгар баар вакансияларга олоҕуран, нэһилиэнньэҕэ эбии үөрэниэн баҕалаах дьону бэлэмниир наадатын туһунан эттэ.

«Бу үлэни биэрээччилэр олохтоохтору былааннаммытынан ылалларыгар уонна каадыр эрэсиэрбэтин кэмигэр бэлэмнээн иһэргэ кыаҕы биэриэ. Саха сирин олохтоохторо, ордук маннык тэрилтэлэр баар оройуоннарыгар олорооччулар, саҥа идэни ылар уонна үрдүк хамнастаах үлэҕэ киирэр кыахтаныахтара«, — диэтэ Наталья Валерьевна.

Маны сэргэ, мунньахха идэҕэ туһаайыы кластердарын иитинэн бырамыысыланнай хампаанньаларга каадырдары бэлэмнээһин боппуруоһун дьүүллэстилэр.  СӨ Бырамыысыланнас уонна геология миниистирэ Максим Терещенко, «Колмар» УК» ХЭУо персоналы салайыыга дириэктэрэ Алена Гаврилова уо.д.а. санааларын үллэһиннилэр.

0
0