Ил Дархан социальнай ситимнэргэ аһаҕас эпиирин кэмигэр 500-чэ ыйытыы киирбитэ. Бириэмэ тиийбэтинэн, сорох ыйытыыларга тустаах министиэристибэлэр кэнники хоруйдаатылар.
Бу ыйытыыга доруобуйа харыстабылын министиэристибэтэ хоруйдуур:
— Поликлиникаларга анал биригээдэлэр тэриллэн, мэдиссиинэ көмөтүн дьиэҕэ оҥороллор. Вирус сибикилэммит сиригэр анал суһал биригээдэ үлэлиир. Сиэстэрэлэр биригээдэлэрэ Роспотребнадзор ыйыытынан тиийэн, биоматырыйаал ылар, атын биригээдэ дьиэҕэ тиийэн өҥөнү оҥорор, үһүс биригээдэ пациеннарга ырысыаптары, чэпчэтиилээх эмтэри аҕалар. Төрдүс биригээдэҕэ быраастар дьиэҕэ ыҥырыынан сылдьан, ыарыһахтары көрөллөр. Оҕолору, ыарахан дьахталлары туспа биригээдэ кэтээн көрөр. Өскөтүн невролог, кардиолог, офтальмолог, эбэтэр атын да исписэлиис көмөтө наада буоллаҕына, дьиэҕэ кэлиэхтэрин сөп. Дьиэттэн тахсымаҥ, бэйэҕитин, чугас дьоҥҥутун харыстааҥ!Поликлиникалар урукку эрэсиимнэригэр эпидемиологическай балаһыанньа тубустаҕына эрэ көһүөхтэрэ.
Ангелина Васильева, “Саха сирэ” хаһыат, edersaas.ru
Хаартыска: yakutia-daily.ru