Олунньу 19 күнүттэн саҕалаан, СӨ Ыксаллаах быһыы-майгы министиэристибэтин кылаабынай управлениетын үөрэтэр-эрчийэр полигонугар хас даҕаны тэрээһин буолла. Ол курдук, маҥнай “пожарная безопасность” исписээлинэскэ Бүтүн Арассыыйатааҕы профессиональнай маастарыстыба олимпиадатын өрөспүүбүлүкэтээҕи түһүмэҕэ ыытылынна.
edersaas.ru
Олимпиадаҕа идэлэринэн теоретическэй билиини-көрүүнү таһынан, баһаарынай тэрили тэнитэн 100 миэтэрэҕэ сүүрүү, анал кирилиэһинэн үөрэтэр башняҕа ыттыы, дьону быыһыыр сатабылларын көрдөрүү, бириэмэҕэ бойобуой таҥаһы таҥныы курдук профессионаллар сатабылларын тургутуута киирэллэр.
Олимпиада түмүгэр Чурапчы кэллиэһин уонна Уус Алдан техникумун устудьуоннара күрэхтэстилэр. Сытыы күрэхтэһиини көрдөрдүлэр, кыайыыны түһүмэх аайы уочаратынан ыллылар. Ол түмүгэр, кыайыылааҕынан Чурапчы кэллиэһин хамаандата таҕыста.
Олимпиада бүтээтин кытта СӨ “Эдэр профессионаллара” (WorldSkills Russia-2019) эрэгийиэннээҕи VII чөмпүйэнээтин “спасательное дело” компетенция күрэхтэһиилэрэ буоллулар. Бу сырыыга юниордарга (14-16 саастаахтар) уонна эдэр профессионалларга (16-23 саастаахтар), уопсайа, аҕыс хамаанда күөн көрүстэ. Бэлиэтээн эттэххэ, тустаах компетенцияҕа күрэхтэһии өрөспүүбүлүкэҕэ аан маҥнайгытын ыытыллар. Эдэр профессионаллар хайысхаҕа Чурапчы кэллиэһин, Уус Алдан техникумун, Мординов аатынан Харбалаахтааҕы үөрэх комплексын, Дьокуускайдааҕы инновационнай технология кэллиэһин хамаандалара кииристилэр. Оттон юниордар хайысхаҕа Нам уулуһун Хамаҕаттатааҕы саха-французскай лиссиэй, Амма улууһун Амма 1-кы нүөмэрдээх уонна Бөтүҥ, Уус Алдан улууһун Мүрү оскуолатын хамаандалара кытыннылар.
Күрэхтэһии тутулуга суох эспиэрдэринэн: СӨ ЫБММ кылаабынай управлениетын үөрэтэр-эрчийэр полигонун, СӨ Быыһыыр сулууспатын, СӨ Баһаары утары судаарыстыбаннай сулууспатын үлэһиттэрэ буоллулар. Сүрүн эспиэрдэринэн преподаватель Василий Васильевич Михайлов уонна СӨ Быыһыыр сулууспатын акваторийдарыгар көрдүүр-быыһыыр сулууспаҕа үлэҕэ уонна ыксаллаах быһыыны туоратыыга управление начаалынньыга Нюргустан Степанович Андреев анаммыттара.
Кыттааччылар 100 миэтэрэҕэ баһаарынай тэрили тэнитэн сүүрэллэр, эмсэҕэлээбит дьоҥҥо бастакы медицинскэй көмөнү оҥороллор, хайалаах сири туорууллар, хааччахтаах усулуобуйаҕа гидравлическай үстүрүөмүнэн үлэлииллэр, суол быһылааныгар түбэспит киһиэхэ көмөлөһөллөр, көрдүгэни умуруораллар, баһаарынай бойобуой таҥаһын түргэнник кэтэллэр, буруолаах сылаас сиргэ үлэ курдук уустук тургутуулары ааһаллар. Маныаха хамаандалар бастатан туран, профессиональнай сатабылларын уонна хамаанданан үлэлэрин көрдөрүөхтээхтэр. Хамандыыртан уонна кини бирикээстэриттэн, туруорбут соругуттан улахан тутулуктаах. Күрэхтэһии бойобуой үлэҕэ тэҥнээх. Манна тоҥуу-хатыы, сылайыы-элэйии барыта баар. Кыайыыга дьүккүөрдээх уонна сомоҕолоһуулаах, түргэн-тарҕан туттунуулаах, барытыгар сатабыллаах үлэлээх хамаанда бастыыр.
Сытыы күрэхтэһиилэр түмүктэринэн юниордарга Амма 1-кы нүөмэрдээх оскуолатын хамаандата бастаата. Иккиһи Нам улууһун Хамаҕаттатааҕы саха-французскай лиссиэй, үсүһү Амма улууһун Бөтүҥ оскуолатын хамаандалара ыллылар. Орто анал үөрэх үөрэх кыһаларын ортолоругар туһааннааҕынан үс бастакы миэстэни Чурапчытааҕы кэллиэс, Уус Алдан техникума (Суотту), Харбалаахтааҕы үөрэх комплекса үллэһиннилэр.
Евгений ПОПОВ, edersaas.ru саайтка анаан.