Өрөспүүбүлүкэ үрдүнэн «Олорор дьиэ уонна куорат эйгэтэ» федеральнай бырайыак чэрчитинэн, «Ыраас уу» бырагырааманан элбэх анал эбийиэк тутулла турар. Олортон биирдэстэринэн – Хаҥалас улууһун Покровскай куоратыгар ууну ыраастыыр ыстаансыйаны тутуу буолар. Бэҕэһээ СӨ ОДьКХ уонна энэргиэтикэҕэ миниистирэ Вячеслав Емельянов тутуу хаамыытын кытта билистэ.
Эбийиэк 2020 сылтан тутуллар, үлэҕэ киллэрэргэ федеральнай уонна өрөспүүбүлүкэтээҕи бүддьүөттэртэн 315,3 мөлүйүөн солкуобай тыырыллыбыт. Бырайыак быһыытынан ыстаансыйа сууккаҕа 2200 куб ууну ыраастыахтаах. Эбийиэк быйыл ахсынньыга үлэҕэ киирдэҕинэ, Покровскай куорат 7000-тан тахса олохтооҕо дьыл ханнык да кэмиттэн тутулуга суох ыраас уунан хааччыллыаҕа. Билигин үлэлии турар уу собуоругар хлору туһаналлар уонна механическай дэниллэр ыраастааһыны эрэ оҥороллор.
Билигин саҥа эбийиэккэ үлэ күөстүү оргуйар. Миниистир Вячеслав Емельянов үлэ хаамыытын билсэн, көрөн-истэн баран, «Бу эбийиэк хаһан үлэҕэ киирэрин Покровскай олохтоохторо күүппүттэрэ ыраатта. Ыстаансыйа сууккаҕа 2000-тан тахса куб ууну бары санитарнай ирдэбилгэ олоҕуран ыраастаан, олохтоохтору иһэр уунан хааччыйыа. Уопсайынан ылан этэр буоллахха, тустаах бырагыраама чэрчитинэн, 2024 сылга диэри өрөспүүбүлүкэ олохтоохторуттан 75 %-рын ыраас иһэр уунан хааччыйыахтаахпыт. 2021 сылга национальнай бырайыагынан өрөспүүбүлүкэҕэ элбэх бырайыак олоххо киллэриллэр. Ол курдук, Покровскай куоракка, Горнай улууһун Бэрдьигэстээҕэр, Үөһээ Бүлүү сэлиэнньэтигэр, Өлүөхүмэ куоратыгар ууну ыраастыыр эбийиэктэр үлэҕэ киириэхтэрэ. Балары тутарга 700-чэкэ кэриҥэ мөлүйүөн солкуобай көрүллүбүтэ. Мантан улахан чааһын федеральнай бүддьүөт уйунна. Кэлэр сылга биһиги тустаах национальнай бырайыак чэрчитинэн, ууну ыраастыыр 4 ыстаансыйаны тутары Сунтаар сэлиэнньэтигэр, Амма улууһун Алтаныгар, Амма сэлиэнньэтигэр уонна Хаҥалас улууһун Үөһээ Бэстээҕэр туруорустубут. Сунтаар улууһун чуолкайдыыр буоллахха, ааспыт нэдиэлэҕэ РФ Тутууга министиэристибэтигэр тустаах бырайыагы олоххо киллэриини быйылгыттан саҕалыыр туһунан бирикээскэ илии баттаатылар. Онон өрөспүүбүлүкэ «Олорор дьиэ уонна куорат эйгэтэ» федеральнай бырайыак чэрчитинэн, быйыл үбүлээһин быһыытынан 1 миллиард кэриҥэ солкуобуйы ылыаҕа. Бу бырайыактар нэһилиэнньэ олоҕо тупсарын туһугар аналлаахтар. Нэһилиэнньэ доруобуйата этэҥҥэ буолара, биллэн турар, ыраас ууттан тутулуктааҕа чуолкай.
Покровскай куоракка тутулла турар эбийиэк былаан быһыытынан ахсынньыга үлэҕэ киириэҕэ. Үлэни үмүрүтүүгэ кыраапыктан хаалыы баар этэ эрээри, билигин ол ситиһилиннэ. Үлэ хаамыыта быдан түргэтээтэ. Онон сыл бүтүүтэ Покровскай куорат уонна Хаҥалас улууһун олохтоохторо ыраас уунан хааччыллыахтара. Эһиилги сааскы халаан кэмигэр, Покровскай олохтоохторо уу хаачыстыбата мөлтүүрүн билиэхтэрэ суоҕа”, — диэн иһитиннэрдэ.
Эбийиэги бэдэрээтчит быһыытынан «ДСА” тутар, тутуу хаамыытын тэрилтэ дириэктэрин солбуйааччы Платон Васильев: “Эбийиэк сүрүн өттүн үмүрүттүбүт. Сайын ууну хаһаанар резервуардар турар акылааттарын бетоннааһыҥҥа кэккэ ыарахаттары көрсөн, кыраапыктан лаппа хаалыы тахсыбыта. Ол эрээри, баар кыһалҕаны син этэҥҥэ быһааран, барытын ситистибит. Билигин эбийиэк ис өттүн оҥоро сылдьабыт, ититэр ситимин тардабыт. Ууну ыраастыыр оборудованиелары таҥан туруордубут. Онон билиҥҥи туругунан, эбийиэк 63 % үмүрүтүлүннэ”, — диэн кэпсээтэ.
edersaas.ru
Хаартыска: Анастасия Филиппова (СИА).