Бэҕэһээ, кулун тутар 5 күнүгэр, Покровскай куоракка сыллата ыытыллар «Хаҥалас хапсаҕайа» турнир чэрчитинэн биллэр тустуук, Азия чөмпүйүөнэ, аан дойду чөмпүйэнээтин боруонса призерун, икки Олимпиада кыттыылааҕын, билигин СӨ Успуорка уонна физическэй култуураҕа миниистирин Леонид Николаевич Спиридонов аатынан тустуу саалатын үөрүүлээх быһыыга-майгыга арыйдылар.
Бэлиэ күнүнэн Хаҥалас олохтоохторун салалта аатыттан СӨ вице-премьерэ Сергей Местников эҕэдэлээтэ: «Тустуу Хаҥалас улууһугар тарбахха баттанар көрүҥүнэн буолар. Саҥа саалаҕа аатырбыт биир дойдулааххыт, РФ успуордун маастарын, Хаҥалас улууһун бочуоттаах олохтооҕун Леонид Спиридонов аатын иҥэрбиккин үөрдэр. Мантан Леонид Спиридонов суолун батыһан саҥа чөмпүйүөннэр тахсыахтара диэн эрэнэбин».
Икки этээстээх, 1 195 квадратнай миэтэрэ иэннээх тустуу саҥа саалата «Мин Сахам сирэ 21-с үйэҕэ» өрөспүүбүлүкэтээҕи бырагырааманан олоххо киирдэ. Саала туох баар аныгы кэмҥэ ирдэнэр тренажердарынан хааччылынна. Бастакы этээскэ көрөөччүлэр трибуналара, гардероб, каасса, харабыл пуоһа, раздевалкалар, суунар хос, быраас кэбиниэтэ бааллар. Оттон иккис этээскэ универсальнай саала, тириэньэр хоһо, дириэктэр кэбиниэтэ уонна саалаҕа тахсар болкуон баар.
«Бүгүн дойдубар мин ааппынан тустуу саалата аһылынна. Бу миэхэ эрэ буолбакка, бүтүн Хаҥалас улууһун олохтоохторугар, тустуу сүгүрүйээччилэригэр үөрүүлээх уонна долгутуулаах бэлиэ күнүнэн буолар. Хаҥаласка олус элбэх саҥа үүнэн эрэр спортсмен баар. Кинилэр үрдүк чыпчааллары дабайалларыгар баҕарабын», — диэн Леонид Спиридонов үөрүүтүн үллэһиннэ уонна тутууну өйөөбүт өрөспүүбүлүкэ баһылыгар, спортивнай тустуу федерациятын бэрэсидьиэнигэр Айсен Николаевка, Хаҥалас улууһун салалтатыгар, спонсордарга уонна тутааччыларга махтанна.
Саҥа тутуу Хаҥаластааҕы ДЮСШ иһинэн үлэлиэҕэ. Бу туһунан СӨ Успуорка уонна физическэй култуураҕа министиэристибэ пресс-сулууспата иһитиннэрэр.