Саахалланар уонна эргэ туруктаах дьиэлэртэн дьону көһөрүү бырагырааматынан өрөспүүбүлүкэбитигэр урукку өттүгэр Дьокуускай куоракка эрэ элбэх кыбартыыралаах дьиэлэр тутуллаллара. Билигин бу бырагыраама ыыра лаппа кэҥээн, улуустарга элбэх кыбартыыралаах таас дьиэлэр тутуллуулара лаппа элбээтэ. Холобур, Хаҥалас улууһун Покровскай куоратыгар ити хайысханан 10-тан тахса элбэх кыбартыыралаах дьиэ дьэндэйбит.
Билигин Покровскайга «Олорор дьиэ уонна куорат эйгэтэ» федеральнай национальнай бырайыак чэрчитинэн, Саха сиригэр саахалланар туруктаах дьиэлэртэн дьону көһөрүү бырагырааманан элбэх кыбартыыралаах үс дьиэ тутуллар. Онон бу сыл бүтүүтэ 80 ыал саҥа кыбартыыра күлүүстэрин тутан, үөрүөхтэрэ-көтүөхтэрэ.
Покровскай куоракка Быраттыы Ксенофонтовтар 29-дээх уулуссатыгар тутулла турар саҥа дьиэттэн 29 кыбартыыраны саахалланар уонна эргэ туруктаах бырагыраамаҕа хапсыбыт олохтоохторго биэриэхтэрэ.
Дьиэни тута сылдьар «Хоту Строй» ХЭУо кылаабынай инженерэ Иван Борисов: «Билигин эбийиэккэ ититэр ситими тардыы барар уонна ис эркиннэрин эпсиэйдэээн оҥорууну саҕалаатыбыт. Кыраапыктан хаалыы суоҕун кэриэтэ. Алтынньыга дьиэҕэ хайаан да итиини биэриэхтээхпит. Оччоҕуна муоста билиитэлэрин ууруу, линолеуму тэлгэтии, кырааскалааһын уонна ааннары туруоруу саҕаныа этилэр. Билигин дьиэ аттынааҕы тэлгэһэтин ыраастаан саҕалаатыбыт. Барыта былаан быһыытынан бардаҕына, сэтинньигэ хаһаайыттарга кыбартыыра күлүүстэрин үөрүүлээх быһыыга-майгыны туттарыахпыт. Улуус үрдүнэн тустаах бырагырааманан бу 14-с дьиэ тутуллан бүтэн эрэр. Санатар буоллахха, оруобуна маннык хабааннаах дьиэ Бырааттыы Ксенофонтовтар уулусса 98-гар тутулла турар. Онон быйыл тустаах бырагыраама чэрчитинэн, үс дьиэни тута сылдьабыт», — диэн билиһиннэрдэ.
Хаартыска: Анастасия Филиппова (СИА).