Хаҥалас улууһун Покровскай куоратыгар саҥа оскуола дьэндэйдэ. Оскуола тутар-таҥар үлэтин, ис бараанын барытын ситэрбиттэр, интерактивнай аныгы ирдэбилгэ эппиэттиир тэрилинэн, кыччыыр-улаатар миэбэлинэн толору хааччыйбыттар. Ити туһунан СӨ Үөрэҕин уонна наукатын пресс-сулууспата иһитиннэрэр.
edersaas.ru
Оскуола 350 миэстэлээх, 25 киэҥ-куоҥ хостоох. Уопсай иэнэ — 6 тыһ. квадратнай миэтэрэ. Быраактыка дьарыктарын ыытарга анаан бары усулуобуйаны тэрийбиттэр. Биридимиэттэринэн тус-туспа лабораториялары сыһыарбыттар. Аны оҕолор физкултуура уруогар, араас көрүҥнэринэн дьарыктаналларыгар усулуобуйаны оҥоро сатаабыттар. Ол курдук, көннөрү мээчиги этэ да барыллыбат, суунар хоско (душ) тиийэ бэлэмнээбиттэр. Киир да – эрчилин! Оннооҕор бэлэм станоктардаах, улахан сиэркилэлээх ритмика хоһо баар.
Итиэннэ биир кэрэхсэбиллээҕэ диэн, аактабай сааланы сахалыы оһуордаан-мандардаан киэргэппиттэр. Доруобуйаларыгар хааччахтаах оҕолор уустуктары көрсүбэккэ киирэллэрин-тахсалларын туһугар пандус, анал лифт туруорбуттар.
Санатан эттэххэ, Покровскай куорат 3-с нүөмэрдээх оскуолатын үөрүүлээхтик аһыы сиэрэ-туома сэтинньи 25 күнүгэр буолуоҕа.
Людмила ПОПОВА, “Саха сирэ” хаһыат, edersaas.ru саайт.
Хаартыска: СӨ тутууга министиэристибэтэ.