Покровскай кэллиэһигэр IT идэтигэр үөрэтэргэ анаан мастарыскыайдары астылар.
Кэллиэскэ IT идэтигэр үөрэтэргэ анаан биэс мастарыскыай «Үөрэхтээһин» национальнай бырайыагынан арыллыбыт. СИА суруйарынан, биэс компетенциянан үлэ саҕаланар. Ол курдук, «Веб-дизайн и разработка», «Разработка компьютерных игр и мультимедийных приложений», «Разработка виртуальной и дополненной реальности», «Разработка мобильных приложений», «Кибербезопасность».
«Биһиги өрөспүүбүлүкэбит бу салааҕа Уһук Илин эрэгийиэнигэр саамай бастыҥнара. Оттон манна саҥа былаһаакка арыллыбытынан, сэҥээрии өссө улаатыа, бырагырааманан бэлэмнээһин хаачыстыбата тупсуо», — диэтэ СӨ Бырабыыталыстыбатын бэрэссэдээтэлин солбуйааччытын э.т. Сергей Местников.
СӨ Үөрэх уонна наука миниистирэ Михаил Сивцев Саха сиригэр Worldskills халыыбынан тэриллибит бу иккис мастарыскыай буоларын эттэ. Итиэннэ маннык мастарыскыайдар ыччат хаачыстыбалаах үөрэҕи ыларыгар көмөлөөх буолуохтарыгар эрэнэрин биллэрдэ.
Хаҥалас улууһун баһылыга Олег Иринеев грант ыланнар улууска IT хайысхата сайдарын бэлиэтээтэ. «2022 сылга «IT-куб» үлэлээн барыахтаах. Устудьуоннары сэргэ, улууспут олохтоохторун кытары бу хайысханан үлэлииргэ тардабыт», — диэтэ.
Идэҕэ урутаан үөрэтии киинин салайар Владислав Хабаров саамай сүрүн болҕомто билигин хаачыстыбалаах үлэни саҕалааһыҥҥа сытарын бэлиэтээтэ. «Граны чахчы сөпкө ылбыппытын көрдөрүөх тустаахпыт. Мастарыскыайдарбыт ааннара барыларыгар аһаҕас буолуохтаах, үлэ сайдыыга туһуланыахтаах», — диэн эттэ.
Үөрэх миниистирэ Михаил Сивцев Покровскай кэллиэһин кэлэктиибигэр саҥа үлэһити — дириэктэр э.т. Сергей Сысолятины билиһиннэрдэ.
+1
+1
+1
+1
+1
+1
+1