Бу күннэргэ буоста үлэһиттэригэр ыттан көмүскэнэр маллары түҥэттилэр. Ол курдук, 700 ультразвуковой прибордары почтальоннарга биэртэлээтилэр.
edersaas.ru
Сүрүннээн, тыа сиригэр үлэлиир почтальоннарга бу олус наадалаах тэрил. 15 миэтэрэ иһинэн үлэлиир, ыттарга туох да буортуну оҥорбот, тыастан куттанан куоталларыгар эрэ аналлаах. Куорат усулуобуйатыгар чааһынай дьиэлэрдээх, бэйдиэ сылдьар ыттардаах оройуоннарга үлэлиир почтальоннарга биэриэхтэрэ.
Кистэл буолбатах, почтальоннар ыкка ытыртарар түбэлтэлэрэ тахсара, күннэтэ ыты кытта охсуһар уонна куотар түгэннэрэ элбэх. Онон, аныгы үйэ почтальона бэйэтин көмүскэнэр тэриллээх буолара – кэм ирдэбилэ.
Тыа сиригэр почтальон үлэтэ ыарахана биллэр. Холобур, быйыл дойду үрдүнэн буоста үлэһиттэригэр “Сыл бастыҥ киһитэ” ааты ылбыт Афанасий Полятинскай суол-иис суох кэмигэр ыраах сытар бөһүөлэктэргэ 10 күн устата 360 килэмиэтири сороҕор сатыы айаннаан, 100-чэкэ киилэлээх таһаҕаһы тиэрдибитэ.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.