Өрөспүүбүлүкэ 20 улууһугар почта 154 дьоҕус терминаллара үлэлээн, бүгүҥҥү туругунан 1500 кэриҥэ өҥө харчыта мобильнай хаасса нөҥүө төлөммүт. Онон почтальоннары дьиэҕитигэр ыҥыран, мобильнай терминал нөҥүө коммунальнай өҥө харчытын төлүүргэ кыах бэрилиннэ.
Анивера Акимова, «Саха сирэ» хаһыат, https://edersaas.ru/
Почта үлэһиттэрэ ааспыт сыл ахсынньы ыйыттан дьоҕус анал терминаллардаахтар. Маннык терминал көмөтүнэн коммунальнай өҥө төлөбүрдэрин, суударыстыбаннай пошлинаны, ГИБДД ыстараабын, нолуогу, төлөпүөн харчытын, кирэдьиити уонна да атын өҥөлөрү төлүөххэ сөп. Төлөбүр «онлайн» режиминэн барар. Ол аата интернет нөҥүө барыта оҥоһуллан, тута төлөбүр туһунан хаасса чиэгэ бэриллэр.
Россия Почтатын Саха сиринээҕи филиалын дириэктэрин солбуйааччы Ольга Хохолова иһитиннэрбитинэн, Чурапчы Мырылатыгар икки нэдиэлэ иһигэр дьоҕус терминал нөҥүө 145 төлөбүр оҥоһуллубут.
Терминал өҥөтүнэн солото суох уонна дьиэлэриттэн кыайан тахсыбат дьоннор туһаныахтарын сөп. Олорор нэһилиэккитигэр маннык саҥа өҥө туһунан олохтоох почта салаатыттан, биитэр 8-800-2005-888 төлөпүөнүнэн билсиҥ.
Анивера Акимова, «Саха сирэ» хаһыат, https://edersaas.ru/