Арассыыйа почтатын үлэһиттэрэ бэлиэ күннэрин көрсө Главпочтамт дьиэтигэр тустаах наҕараадалары туттулар.
Федеральнай почта сулууспатын Саха сиринээҕи салаатын салайааччыта Петр Птицын тэрээһиҥҥэ быйылгы уонна эһиилги былааннарын кэпсээтэ. Ол курдук, мантан инньэ Арассыыйа почтата IT хампаанньалар кэккэлэригэр киирэн, оҥорор өҥөтүн үгүс өттүн сыыппараҕа, компьютерга көһөрбүт. Уус Майаҕа уонна Чульмаҥҥа модульнай саҥа почта дьиэлэрэ тутуллуохтара, куоракка уонна тыаҕа баар сорох почтамнар өрөмүөннэниэхтэрэ. Петр Птицын бэлиэтээбитинэн, үлэһит хамнаһа быйылгыттан үрдээбит, былаан барыта туолбуттар.
«Саха сирэ» хаһыат сүрүн редактора Чокуур Гаврильев сурутууга үчүгэй көрдөрүүлээх почта отделенияларыгар «Сахамедиа» холбоһук аатыттан харчылаах сертификаттары туттарда. Кини дьон сэргэ кэтэһэр хаһыатын томороон тымныыга, өҥүрүк куйааска тиэрдэр почта үлэһиттэригэр суруналыыстар ааттарыттан махтанна.
Эҕэрдэ тылларын СӨ Инновация министиэристибэтиттэн Андрей Суслов, Сибээс профсойууһуттан Татьяна Беленко, Ил Түмэнтэн дьокутаат Мария Христофорова тиэртилэр. Тэрээһини “Судаарыстыба дьаамсыктарын сыдьааннара” диэн Хаҥалас улууһуттан кэлбит уопсастыбаннай тэрилтэ ырыанан-тойугунан киэргэттэ.
РФ Сыыппаранан сайдыы, сибээскэ уонна массовай коммуникацияларга министиэристибэтин бочуотунай грамотатынан Дьокуускайдааҕы почтамт оператора Марианна Иванова наҕараадаланна.
Кэккэ почта үлэһиттэрин «Почта России» хампаанньа генеральнай дириэктэрин махтал суругунан, «CӨ сибээһин бочуоттаах үлэһитэ» бэлиэнэн наҕараадалаатылар.
Edersaas.ru
Саина Титова (СИА) уонна Чокуур Гаврильев хаартыскаҕа түһэриилэрэ.