Дьокуускай куорат 2-c №-дээх полиция дьуһуурунай чааһыгар куорат олохтооҕуттан 22 тыһ. солк. суумалаах планшет сүппүтүн туһунан үҥсүү киирдэ.
Холуобунай ирдэбил үлэһиттэрэ суһаллык көрдөөн, эрдэ сууттана сылдьыбыт 32 саастаах уорбаланааччыны туттулар. Уорбаланааччы Ньурба улууһугар аһыы утах иһэн баран, Дьокуускай куоракка айанныырга санаммыт. Итирик туруктаах сылдьан Дьокуускай куоракка айаннаан кэлбит. Хас да күн устата куорат гостиницаларыгар хоно-өрүү сылдьыбыт. Онтон хонугун төлүүр харчыта бүппүтүгэр, уорарга санаммыт. Ол туһуттан балыыһаҕа киирэн ыарыһахтар сытар палааталарын кэрийэ сылдьан, туумба үрдүгэр планшет сытарын көрбүт уонна хаһаайын суоҕугар планшеты сойбоппут.
Арассыыйа Федерациятын Холуобунай кодексатын «уоруу» диэн 158-с ыстатыйатын иккис чааһынан холуобунай дьыала тэрилиннэ.
Ульяна ЗАХАРОВА, edersaas.ru
+1
+1
+1
+1
+1
+1
+1