Соторутааҕыта Санкт-Петербург куоракка Саха сирин уран тарбахтаахтарын оҥоһуктарын быыстапката үрдүк таһымнаахтык ыытыллыбыт. Бу туһунан СӨ бастайааннай бэрэстэбиитэлистибэтин пресс-сулууспата иһитиннэрбит.
“Саха сирин хаар оһуордара” быыстапкаҕа норуот маастардарын, бэйэлэрин баҕаларынан сөбүлээн дьарыктанааччылар, түмсүүлэр уус-уран оҥоһуктара туруоруллубуттар. Питер олохтоохторо таҥаһы-сабы, кылтан-сиэлтэн киэргэллэри, сэлээппэлэри, оҕуруолаах-мандардаах оҥоһуктары сөҕө-махтайа көрбүттэр. Бу күүтүүлээх тэрээһин силигин Ньурбаттан, Анаабыртан, Дьокуускайтан, Алдантан тиийбит кэлэктииптэр, артыыстар кэнсиэртээн ситэрэн-хоторон биэрбиттэр. Маннык сэргэх тэрээһини Сибиир уонна Уһук Илин норуоттарын култуураларын сайыннарар “Хотугу кустук” Пуонда уонна СӨ бастайааннай бэрэстэбиитэлистибэтэ тэрийбиттэр.
Национальностар дьиэлэрэ Санкт-Петербурдааҕы СКТ дириэктэрэ Елена Кузнецова ыраахтан тиийбит ыалдьыттар ураты кэрэ быыстапкаларын дьоҥҥо-сэргэҕэ көрдөрбүттэригэр, “Хотугу кустук” пуонда бэрэсидьиэнигэр Александра Борисоваҕа, өрөспүүбүлүкэ бастайааннай бэрэстэбиитэлистибэтигэр бэртээхэй бырайыагы көҕүлээбиттэригэр, быыстапканы тэрийиигэ өйөбүл буолбуттарыгар, көмөлөспүттэригэр махтаммыт.
РФ Бэрэсидьиэнин иһинэн СӨ бастайааннай бэрэстэбиитэлин солбуйааччы Юрий Кравцов Санкт-Петербург уонна Саха сирэ доҕордоһууларын бөҕөргөтүүгэ кылаатын иһин “Саха сирэ уонна Россия 385 сыл бииргэ” бэлиэни Елена Кузнецоваҕа, бастайааннай бэрэстэбиитэлистибэ аатыттан махтал суруктары маастардарга: Анисия Федороваҕа, Ольга Колодезниковаҕа, Мария Атласоваҕа, Мария Сидороваҕа туттарбыт.
Тэрээһиҥҥэ сылдьыбыттар быыстапканы, кэнсиэртэри олус хайҕаабыттар, астыммыттар. Сүктэр кыыһы таҥыннарыы сиэрин-туомун көрөн улаханнык сөхпүттэр-махтайбыттар. Долгутуулаах тэрээһин оһуохайынан түмүктэммит.