Саха омукка уокка буспут эт былыр-былыргыттан күүс-уох биэрэр ас буолар. Үйэлэр тухары дьон эти буһарар араас ньыманы толкуйдууллара. Ол курдук, биһиги кэммитигэр эти шашлыктаан буһарыы киэҥник туттуллар. Дьон маҕаһыынтан бэлэм мангалы, шампуру атыылаһан туттар. Оттон уруһуйдьут идэлээх Игнатий Егоров бэйэтэ фантазиялаан, бэрт кэрэхсэбиллээх мангал оҥостубут.
Кини устар ааллар, пираттар тустарынан остуоруйалары сэргиир буолан, Фрэнсис Дрейк диэн Англия королеватыгар каперынан сылдьыбыт пират «Көмүс Тугут» хараабылын макета мангалы оҥостубут. Хас биирдии бытархай оҥоһуутун чочуйан туруорбут. Өҥүн уокка сиэниллибэт кыраасканан соппут. Күлүүкэтин пираттар туттар Испания шпагата гына оҥорбут. Уу кутуллар иһитин көмүс угуллар сундууга гыммыт. Хараабыл былааҕа, мачтата, шпангоута (хараабыл искилиэтэ) барыта үүт-үкчү «Көмүс Тугут» киэниттэн туох да уратыта суох. Игнатий бэйэтэ этэринэн, кини бу мангалы былырыын сайыҥҥыттан оҥорон саҕалаабыт уонна быйыл ыам ыйыгар түмүктээбит. Билигин кини эмиэ муораҕа сыһыаннаах бырайыак толкуйдуу сылдьар. Дьоҕурдаах дьон айбыт сэбиргэллэрэ дьоҥҥо туһалаах эрэ буолбакка, көрөргө да үчүгэй.
Николай Попов «Саха сирэ» хаһыат, edersaas.ru