Саха сиригэр Пионерия төрүттэммитэ 95 сылыгар аналлаах тэрээһин академик Афанасий Чугунов аатынан Мэлдьэхси орто оскуолатыгар бэрт сэргэхтик ыытылынна.
edersaas.ru
Тэрээһини «Мэҥэбил” түмэли салайааччы, РФ уопсай үөрэхтээһинин бочуоттаах үлэһитэ Надежда Андросова көҕүлээн, тэрийэн ыытта. Манна нэһилиэк бэтэрээннэрэ, ааспыт кэм пионердара, оскуола оҕолоро кыттыыны ыллылар.
Тэрээһин саҕаланыытыгар урукку кэми санатан, пионер былааҕын, горн тутан, барабааны охсон киирдилэр. Надежда Андросова үөрэнээччилэргэ Сэбиэскэй Сойуус саҕана пионерия суолтатын, кинилэр таҥастарын-саптарын, дьоруой пионердар сырдык олохторун, Саха сирин дьоруой пионера Сима Сергеев олоҕун билиһиннэрдэ. Өр сыл Мас Булгунньах оскуолатыгар пионер баһаатайынан үлэлээбит Мария Скрябина ахтыытын аахпытын олус сэргээн иһиттилэр.
Оскуола үөрэнээччилэрэ Нейна Шарина, Руслан Михайлов оччотооҕу пионердар таҥастарын кэтэн көрдөрдүлэр. Үлэ бэтэрээннэрэ пионер саҕанааҕы кэмнэрин оҕолорго билиһиннэрдилэр. Спорт, сцена бэтэрээнэ Роман Романов горнист, барабаанньыт буола сылдьыбытын, пионерия олоҕор кыттыытын бу баардыы кэпсээтэ. Үлэ, сцена бэтэрээнэ Мария Андросова оскуола олоҕор көхтөөх үлэтин, бэтэрээннэр сэбиэттэрин салайааччы Аграфена Васильева хайдах пионерга киирбитин билиһиннэрдэ, үбүлүөйдээх өйдөбүнньүк бэлиэлэри туттартаата. Бу күн оҕолор эбээлэрин, эһээлэрин кэпсээннэрин истэн, пионер диэн кимин билэн тарҕастылар.
Ньургуйаана СКРЯБИНА-САЙДЫЫНА, “Саха сирэ”, edersaas.ru cайтка анаан