Бүгүн өрөспүүбүлүкэ5э В.И. Ленин аатынан пионерскай тэрилтэ тэриллибитэ 95 сылын уонна аныгы үйэҕэ Оҕо уопсастыбаннай хамсааһынын 25 сылын үөрүүлээхтик бэлиэтииллэр.
Елена ПОТОЦКАЯ, «Саха сирэ» хаһыат, edersaas.ru
Төһө да сыл аастын, араас көлүөнэ дьон пионер кэминээҕи горн тыаһын, барабан дирбийэрин, аалай кыһыл хаалтыһы бааммыт оҕо саастарын үйэ-саас тухары умнуохтара суоҕа. Кулуһун уотун суоһугар дьоллоох олох иннибитигэр баарын ыра санаа оҥосторбут, Ийэ дойдуга бэриниилээх, төрөөбүт түөлбэбитигэр туһалаах, үөрэхтээх дьон буолан тахсыахпыт диэн үөрүүлээх быһыыга-майгыга кэс тылы этэрбит. Кыһыл хаалтыспытын баанан, чиэс биэрэн суолталаах тэрээһиннэргэ: Улуу Кыайыы болуоссаттарыгар уонна сквердэригэр бочуоттаах караулга, быыбар уурунатын аттыгар, оскуолабыт үөрүүлээх тэрээһиннэригэр, ытык кырдьаҕастары чиэстээһиҥҥэ кыттарбыт. Тимуровскай үлэ, факеллаах хаамыы, «Зарница» оонньуу, «Пионерская правда» уонна «Бэлэм буол» хаһыаттар, «Костер» уонна «Мурзилка» сурунааллар — бу эмиэ пионер оҕо сааспыт умнуллубат түгэннэрэ.
Бүгүн бу суолталаах тэрээһини өрөспүүбүлүкэ бары оскуолаларыгар, оҕо уопсастыбаннай тэрилтэлэригэр өрө көтөҕүллүүлээхтик ыыттылар.
Дьокуускайга коммунистар партиялара куорат оскуолаларын иһинэн үлэлиир пионерскай этэрээттэри чиэстээтилэр, актыбыыстары наҕараадалаатылар уонна орто сүһүөх кылаас оҕолорун пионер кэккэтигэр ыллылар.
Баартыйа бэтэрээннэрэ оҕолого үөрүүлээх быһыыга-майгыга кыһыл хаалтыс баайдылар.
Тыа сирин оскуолаларыгар эмиэ киэҥ ис хоһоонноох тэрээһиннэр буоллулар. Оскуолалары түмэн сорох улуустар пионерскай слеттары ыыттылар. Бу хаартыскаҕа Чурапчы Хадаарыгар пионерскай кулуһуну үөрүүлээхтик уматыы түгэнэ.
Өлүөхүмэ орто оскуолатыгар пионер баһаатайдары чиэстээһин буолла.
Бүлүү куоратыгар бэтэрээн пионербаһаатайдары кытта үөрүүлээх көрсүһүү буолла. Үгүс араас көлүөнэ дууһатыгар үтүө өйдөбүлү хаалларбыт баһаатайдарга эдэр саастарын эргиттилэр.
— РФ Президенэ Владимир Путин уурааҕынан Бүтүн Арассыыйатааҕы Оҕо хамсааһына тэриллибитэ. Оттон Саха сиригэр Ил Дархан Егор Борисов 2015 сыллаахха анал ыйааҕынан ахсынньы 5 күнүн СӨ Оҕо хамсааһынын күнүнэн биллэрбитэ. Онон Саха сиригэр оҕо уопсастыбаннай хамсааһыннара олус тэрээһиннээхтик үлэлииллэр, — диэн бүгүн Пионерия күнүгэр анаммыт «Сахамедиа» холдинг «Акцент» быраагырааматыгар СӨ Аҕа баһылыгын иһинэн үлэлиир «Дьулуур» оҕо кэлим хамсааһынын бэрэссэдээтэлин солбуйааччы Александра Антоева кэпсээтэ.
Оҕо дыбарыаһыгар В.И. Ленин аатынан пионерскай тэрилтэ тэриллибитэ 95 сылыгар анаммыт өрөспүүбүлүкэ бэтэрээн баһаатайдарын чиэстиир «Баһаатай, эн ааккынан…» диэн үөрүүлээх бырааһынньык буолла.
Елена ПОТОЦКАЯ, «Саха сирэ» хаһыат, edersaas.ru