Пиэрмэр Яков Яковлевич Андреев Горнай Аһыматыгар олорор. Бастаан биэс ынахтаах бэйэтэ, билигин 40 сүөһүнү кыстыкка киллэрдэ. 2017 сыллаахха саҕалааччы пиэрмэр куонкуруһугар кыттан, 2 мөлүйүөн 750 тыһыынчаны ылары ситиспитэ. Ол көмө харчынан 14 туҥуй атыыласпыта, биэс уон төбө батар хотонун туттубута, оту рулоннуур (пресс-подборщик), от мунньар, куопсук, погрузчик атыылаһан үлэтин саҕалаабыт. Быйыл биир да сүөһүтэ кытараабакка, 32 туонна үүтү ыан ылбыттар. Яков хаһаайыстыбатын бэйэтэ уонна уола Стас көрөллөр. Сайынын эдьиийдэрин көмөлөһүннэрэр эбит. Яков түгэнинэн туһанан, Евдокия, Дора, Вера Егоровтарга, Леонтьевтарга махталын тиэрдэр.
1.Күммүт сарсыарда биэс чаастан саҕаланар. Чэй иһэн баран тута хотоммутугар тахсабыт.
2.Ынахтарбытын ыан баран от киллэрэбит, саах күрдьэбит.
3.Аҕыс чааска киирэбит. Кыратык сынньанан баран эмиэ уон чааска саах таһааран балбаахтыыбыт уонна барыларын уулатабыт.
4.Балбаахпыт тоҥноҕуна сарсыныгар хомуоска тиэйэ-тиэйэ бөх тоҕор сиргэ (сыбаалкаҕа) илдьэбит.
5.Эбиэккэ аһаан, сынньанан баран үс чааска эмиэ тахсан от киллэрэбит, саах күрдьэбит, сүөһүлэрбитигэр уотурба сиэтэбит.
- Сайынын эдьиийдэрбитин көмөлөһүннэрэбит. Түгэнинэн туһанан, Евдокия, Дора, Вера Егоровтарга, Леонтьевтарга махталбытын тиэрдэбит.
«Ол быыһыгар дьиэ үлэтэ эмиэ хаһан да бүппэт. Нэдиэлэҕэ иккитэ тыраахтарынан уу баһабын. Сайынын Харыйа диэн сайылыкка көһөн, ынахтарбытын киэҥ нэлэмэн сыһыыларга мэччитэн үүт ыыбыт. Быйыл, хата, ынах ыыр аппараат ылынан абыранныбыт, былырыыҥҥыга диэри илиинэн ыы олорбуппут», — диэн Яков сонунун үллэстэр. Сүрүн кыһалҕата диэн, оттуур сирэ суох. Онон отун аҥаарын атыылаһан ыларыгар тиийэр эбит. Быйыл 40 сүөһү кыстыкка киирдэ. Олортон сүүрбэтэ ыанар ынах, биир атыыр оҕус, уон тоҕус борооску.
Виктория Бястинова
Хаартыскалар Я.Я. Андреев тиксэриилэрэ