Арассыыйа уонна Украина сыһыаннаһыыларынан дьон-сэргэ санааларын үллэстэллэр.
Таатта улууһун Дьохсоҕон нэһилиэгин баһылыга Петр Захаров:
—Аан дойду олоҕун сүрүн укулаатын халыҥ хапытаал анныгар хам баттыан баҕарар, бары норуоттары талбыттарынан көлөһүннээн баайдарын хаҥатынарга тус интэриэстээх эргимтэлэр баалларын тухары сир Ийэ үрдүгэр иллээх-эйэлээх олох олохтонуо ыраах.
Арҕаа дойдулар уонна кинилэр хос моонньохторо, куомуннаахтара биһиги дойдубутун — модун Арассыыйаны хааннаах хабалаларыгар ылаары ыыппыт сүрүн толкуйдарын урусхаллыыр, дойдубут көмүскэллээх, дьоммут-сэргэбит олоҕун уйгута туруктаах буоларын туһугар тоҕоостоох кэмҥэ саамай сөптөөх быһаарыныыны дойдубут салалтата ылбытын толору өйүүбүн. Быһаарыныы төһө да саныахха уустугун иһин, мантан атын суол баарын көрбөппүн.
Дойдубут Украинаҕа ыытар тус сыаллаах байыаннай операцията бу НАТО өттүттэн суоһуур кутталы уодьуганнааһыҥҥа эрэ туһаайыллар утары дьайыы буолбакка, Арҕаа дойдулар дойдубут экономикатыгар дьайар, олуйсар хабалаларыттан босхолонууга, суверинитеппытын көмүскээһиҥҥэ уонна бастатан туран инники олохпут уйгутун туруулаһыыга туһаайылларыгар саараама саарбахтаабаппын.
Арҕаа дойдулар биһиги күннээҕи олохпутугар, дойдубут экономическай тутулугар кырата суох охсуулары оҥорон эрэллэр. Ол эрээри, бэйэ-бэйэбитин өйөһөн бу быыһык кэмнэри мүлчү түһүөхтээхпит. Туттар сэпкэ-сэбиргэлгэ эрэ буолбакка, аска-таҥаска сыаналар биллэ ыараатылар, ыарыы да тураллар. Бу түгэҥҥэ алын дохуоттаах, үлэтэ суох дьоммут ордук оҕустарыахтара, кэккэ ыарахаттары көрсөллөрө саарбаҕа суох. Ыал, дьиэ кэргэн экономиката туруктаах буоларын туһугар толкуйдуохпутун, санаабытын түмүөхпүтүн наада, хас биирдии нэһилиэктэр иннилэригэр ити сорук бастакы кэккэҕэ тахсар кэмэ кэллэ. Ханнык баҕарар судаарыстыба көҥүл тутуллаах буоларын мэктиэтэ кини норуотун аһыыр аһынан бэйэтэ толору хааччыйыытыгар тирэҕирэр. Онон тыабыт хаһаайыстыбатыгар, норуоппут хаһаайыстыбатын бары салааларыгар болҕомто ууруллуоҕа, көдьүүстээх үлэ тэриллэн ыытыллыаҕа. Хас биирдии тыа ыала тиэргэнигэр оҕуруот аһын олордоругар, түргэнник ситэр салааларынан дьарыктанарыгар тус сыаллаах өйөбүллэри оҥоруохтаахпыт. Аһыыр ас, хаһаас ас баар буоларын ситиһиэхтээхпит. Эрэнэбин уонна бигэтик итэҕэйэбин, дойдубут экономикатын туруктаах оҥорууга тус сыаллаах дьаһаллары ылынан, бэйэ оҥорон таһаарыытыгар болҕомто ууруллуоҕа. Тас дойдулартан киирэ турбут, күннээҕи олохпутугар тутта олорбут малларбыт бэйэ бородууксуйатынан толору солбуллуохтара. Импортозамещение хайысхата күүһүрүөҕэ. Барыта биирдэ баар буолан хаалыа суоҕа, ол өйдөнөр, ол эрээри бу хайысхаҕа, бу сылларга сири ылан эрдэттэн хамсаммыппыт үтүө түмүктэри көрдөрүө дии саныыбын.
Арассыыйаҕа хостонор сир баайдарын сыаналара кэнники күннэргэ лаппа ыараатылар, ол курдук 1000 кубометр газ сыаната 2279 доллартан таҕыста, 1 баррель нефть сыаната 119 доллар кирбиини куоһарда, бу кулун тутар ый 3 күнүнээҕи туругунан. Маны тэҥинэн аан дойду ырыынагар туорах бурдук (пшеница), алюминий, никель, палладий сыл саҕаланыытынааҕы таһымнарыттан биллэ ыараатылар. Саамай ордук ыарааһын туорах бурдукка бэлиэтэнэр. Бу барыта биһиги дойдубут тас дойдулары кытта эргинэр сүрүн баайбыт буолар. Арҕаа дойдулар атыы-тутуу эргимтэтигэр банковскай платежнай систэмэлэриттэн Арассыыйаны араарыыларын түмүгэр, Арассыыйа платежнай систиэмэтин нөҥүө уонна олохтоох валютабытыгар, солкуобайынан атыыны-тутууну ыытыы саҕаланыаҕа. Оччотугар, биллэр-көстөр аналитиктар этэллэринэн, солкуобайбыт туруктаах буолуутугар сүрүн төрүөт үөскүөҕэ.
Кэлэр кэскилбит, инники сайдыыбыт, туруктаах, эйэлээх олохпут укулаатын күн бүгүн туруулаһа сылдьар дьоммутугар, кырдьык кыайарыгар эрэлбитин сүтэримиэҕиҥ!