Дизайнер Петр Яковлев «Подиум» диэн Арассыыйа тэлэбиисэринэн көстөр реалити-шоутугар кыттаары сайаапка ыыппыт. Бу бырайыак 17-с төгүлүн ыытылларыгар кыттааччылары хомуйар. Онно ким кыттара сотору биллиэхтээх.
Петр Яковлев 14 сааһыттан модельердар куонкурустарыгар кыттар. Норуоттар икки ардыларынааҕы бэстибээллэр хас да төгүллээх призердара.
«Анкетаҕа элбэх ыйытыы баара. Арааһа, шоуга ордук наадалаах ыйытыылары биэрбит буолуохтарын сөп. Холобур, төһө кыыһырымтаҕайгыный, туохтан ордук хомойоҕунуй диэннэр. Профессиональнай үлэбинэн ыйытыылар эмиэ бааллара. Сатаан уруһуйдуурбун, иистэнэрбин, үлэлэрбин чуолкайдаспыттар этэ. Ону сэргэ, хаартыскаларбын, үлэм түгэннэрин көрдөрөр ссылкалары көрдөөбүттэрэ», — диэн СИА-ҕа кэпсиир.
«Подиум» бырайыак Америка «Project Runway» шоутун курдук, Арассыыйа модельердарыгар анаммыт бырайыак. Кыттааччылар таҥас-сап тигэллэр, мөлтөх таҥастаах модельер туораан иһэр.
Петр Яковлев «Саһарҕа» өрөспүүбүлүкэтээҕи муода бэстибээлин гран-притын хаһаайына, «Новая Россия – XXI век» норуоттар икки ардыларынааҕы куонкурус финалиһа, «Золотое лекало» диэн Уһук Илин муодатын бэстибээлин «Прет-а-порте» анал аатын хаһаайына, Венгрияҕа буолбут «Звезда императрицы» дизайнердар куонкурустарын кыайыылааҕа.
Николай ПОПОВ, «Саха сирэ» хаһыат, edersaas.ru