Петр Сивцев: «Атын дойдулары кытары тэҥҥэ аахсар модун судаарыстыбаҕа олорорбуттан үөрэбин»
Төрүт Сокуоҥҥа киирэр уларытыылар тустарынан Уус Алдан улууһун Найахы нэһилиэгин дьаһалтатын баһылыга Петр Сивцев тус көрүүлэрин үллэстэр:
– Бэйэм Арассыыйа гражданина буолан олорон тус санаабын этэр буоллахпына, уопсай олох таһымыгар сайдыы тохтообокко бара турар. Устуоруйаҕа улахан ыһыллыы кэмигэр 1993 сыллаахха ылыллыбыт РФ Конституциятыгар оччолорго сөптөөх, дойдуну ыспат туһугар сокуоннар киирдэхтэрэ. Олорон истэх аайы сокуоннар ситэтэ суохтарын билиҥҥи олох ирдэбилинэн уларыйа тураллара, ону тэҥэ судаарыстыбалар сокуоннарыгар, устааптарыгар уларыйыылар киирэн иһэллэрэ туоһулуур. РФ Конституциятыгар тосту уларыйыылар буолбакка эбэн биэриилэр киирэн биэрэллэрэ сөптөөх. Онтон дьону-сэргэни долгутар РФ Бэрэсидьиэнин дуоһунаһыгар олоруутун болдьоҕор, мин тус бэйэм күүстээх, атын дойдулары кытары тэҥҥэ аахсар модун судаарыстыбаҕа олорорбуттан үөрэбин диэн этиэм этэ. Билигин киһи бэйэтин олоҕун таһымын, билиитин-көрүүтүн үрдэтинэригэр судаарыстыба өттүттэн өйөбүл баар. Онтон бэйэ ситиспэтэҕин былаас буруйугар соҥнуур сыыһа. Онон РФ Конституциятыгар эбии киирэр уларыйыылары өйөөн, ордук социальнай, национальнай боппуруостары ким утарыай, онон куоластааһыҥҥа кыттар санаалаахпын.
«Мүрү саһарҕата», ulus.media саайтан.