Петр Пиэрибэй Дьокуускай куораты тутууга интэриэһэ

Ааптар: 
Бөлөххө киир:

Арассыыйа күнүгэр “Арассыыйа – мин историям” Историческай пааркаҕа араас хайысхаларынан өрөспүүбүлүкэ уопсастыбаннай диэйэтэллэрэ ыччаттарга экскурсия ыыттылар.

Тэрээһини “Билии” уопсастыба Саха сиринээҕи салаатын салайааччыта Петр Николаев сүрүннээтэ.

— Уопсайа 13 экскурсияны былааннаабыппыт. Уопсастыбаннай диэйэтэллэри кытта тиэмэлэри Арассыыйаҕа уонна Саха сиригэр сыһыаннаан, эйгэлэринэн арааран, эрдэттэн кэпсэппиппит. Сорох экскурсоводтар тэрээһин буолуон иннинэ Историческай пааркаҕа бэйэтигэр кэлэн эрдэттэн бэлэмнэммиттэрэ. Элбэх сиринэн сылдьар, билэр-көрөр дьон, экскурсияларын олох анаан арыллан туран ыыттылар. Сайыҥҥы лааҕырдарга сылдьар оҕолор, бу күн быыстапкалары интэриэһиргээн көрө кэлбит дьон олус сэҥээрдилэр.

Икки өттүттэн олус туһалаах тэрээһин буолла диэн сыаналаатыбыт. Аан бастакы саҕалааһыммыт бэркэ табылынна. Маннык экскурсиялары уопсастыбаннас өйөбүлүнэн өссө да ыытыыһыбыт диэн толкуйга кэллибит, — диэн санаатын Петр Николаев үллэһиннэ.

Уопсастыбаннай диэйэтэллэр экскурсияларын бастакынан историческай наука хандьыдаата, ХИФУ доцена, РФ Бэрэсидьиэнин эдэр учуонайдарга анаммыт гранын хаһаайына Айтал Яковлев ыытта.

Киһи биир тыынынан сыана быһар лиэксийэтэ – наһаа үчүгэй! Ол туоһута – оҕолор эдэр учуонайы эккирэтэ сылдьан, боппуруоһунан симэн кэбиһиилэрэ буолла.

Петр Пиэрибэй Дьокуускай куораты тутууга тоҕо улахан интэриэстээх этэй? Саха сирин киин куората Уһук Илин эрэгийиэни сайыннарыыга олугу ууруохтааҕа эрдэттэн былааннаммыта.

Ыраахтааҕы быһыытынан Петр Пиэрибэй Арассыыйа Кытайы ыкса сибээһи олохтооһуна Саха сирин кытта ыкса сибээстээх буолуоҕун эрдэттэн өтө көрбүтэ. Уһук Илин эрэгийиэнигэр баар айылҕа баайа – сиртэн хостонор күндү таас, түүлээх, тимир урууда, туус Саха сиригэр үгүһэ чахчы. Онон Кытайы кытта кыраныыссалаһа сытар Уһук Илиҥҥи эрэгийиэн Арассыыйа сайдыытыгар сүҥкэн оруоллааҕа.

Ыраахтааҕы ол оннук санаатын 300 сыл анараа өттүгэр Камчаткаҕа тиийэ тэриллибит икки научнай эспэдииссийэ бигэргэппитэ. Дьокуускайынан ааспыт оччотооҕу кэм учуонайдара Саха сирин киин куората хайаан да научнай-чинчийэр салаа сайдыытыгар улахан оруоллаах эбит диэн санааҕа кэлбиттэрэ. XXI үйэҕэ Арассыыйа ыраахтааҕыта Петр Пиэрибэй Дьокуускайы дойдуга ааттаах-суоллаах сайдыылаах куорат оҥорор баҕа санаата туолла.

Бүгүҥҥү күҥҥэ биһиги Дьокуускайбыт аан дойдуга биллэр научнай сайдыы киининэн буолла, — диэн киһи истэ туруох курдук кэпсээтэ эдэр учуонай Айтал Яковлев.

Саха сиригэр дьахталлар уопсастыбаннай хамсааһыннарын уонна күн бүгүҥҥэ диэри Саха сирин дьахталлара Арассыыйа сайдыытыгар киллэрэр сүҥкэн кылааттарын туһунан СӨ Дьахталларын уопсастыбаннай тэрилтэлэрин сойууһун бэрэссэдээтэлэ, РФ Дьахталларын сойууһун Бюротун чилиэнэ Анжелика Андреева билиһиннэрдэ.

Уопсастыбаннай диэйэтэл бэйэтин эксурсиятын ааспыт үйэ 30-с сылларыттан саҕалаан, XXI үйэҕэ дьахталлар хамсааһыннарын кытта ыкса сибээстээтэ.

Ити курдук, Арассыыйа күнүгэр анаммыт уопсастыбаннай диэйэтэллэр ыччаттарга анаан тэрийбит экскурсиялара бастакы саҕалааһын быһыытынан олус табылынна. Өссө да маннык тэрээһиннэр тиһигин быспакка ыытыллыахтара.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриитэ.

+1
0
+1
0
+1
0
+1
0
+1
0
+1
0
+1
0