Бүтэһигин дойду чөмпүйэнээтиттэн саха бөҕөһө 2019 сыллаахха боруонса мэтээли аҕалбыта. Ол кэмҥэ өссө Михаил Иванов Москва куоракка дьарыктанар этэ. Ол аата Саха сиригэр дьарыктаммыт бөҕөстөртөн мэтээли бүтэһигин, үс сыл анараа өттүгэр, Одинцово куоракка ыытыллыбыт чөмпүйэнээттэн ыллахпыт. Онно Арыйаан Тютрин боруонса мэтээлгэ тиксэн турар.
edersaas.ru
Быйылгы чөмпүйэнээккэ былырыыҥҥы курдук икки бэһис миэстэлэннибит. Саамай ыраах Уйгулаан Иванов уонна Виктор Рассадин эрэ тиийдилэр. 57 кг ыйааһыҥҥа Уйгулаан Иванов боруонса мэтээл иһин киирсиигэ норуоттар икки ардыларынааҕы кылаастаах успуорт маастара Азамат Тускаев диэн Алания бөҕөһүн кытары көрсүбүтэ. Бөҕөстөрү билиһиннэрэн бүтүөхтэригэр диэри хапсыһыы номнуо түмүктэммитэ. Тускаев уолбутун үстэ төхтөрүйэн эргитэн, 11 баалы ылан быһаччы кыайыыны суруммута.
Виктор Рассадин эмиэ боруонса иһин киирсиигэ Радик Валиев (Алания) бөҕөһүн кытары күөн көрсүбүтэ. Дьиҥэ тэҥ соҕус киирсии маҥнайгы аҥарыгар Виктор бааллары биэртэлээн кэбиһэн, ситэригэр ыарахан балаһыанньаны оҥостубута. Онон бүтэһиккэ хас да приему оҥортолуу сатаата да, 6:7 ахсаанынан хотторбута.
Уоннааҕы уолаттарбыт бары туораабыттара.
Уолаттарбыт хапсыһыыларын илэ хараҕынан көрөн, Улан-Удэттан бэҕэһээ эрэ көтөн кэлбит спортивнай суруналыыс, тустуу эксперэ Петр Павлов туох санаалааҕый?
— Мэтээл суоҕа хомолтолоох. Эдэр уолбут Уйгулаан Иванов Тускаев курдук күүстээх бөҕөскө түбэспитэ. Онтон Виктор Рассадин Валиевы кыайан кэбиһиэн сөп этэ. Онон, икки бөҕөспүт бэһис миэстэ буоланнар, Арассыыйа киэҥ ыҥырыылаах (расширеннай) састаабыгар киирдилэр диэн бэйэбитин уоскутунабыт эрэ. Тустууктарбыт дойду чөмпүйэнээтигэр кыттыыларын мөлтөх диэн сыаналыахха наада. Онно, биллэн турар, хас да төрүөт баар.
Бастакытынан, урукку күүстээх бөҕөстөрбүт тустан бүтэннэр, билигин көлүөнэ уларыйар быыһык кэмэ буола турар. Онон, биһиги сабаҕалааһыммытынан, бу чөмпүйэнээттэн иһэ үлүннэҕинэ боруонсаны ылыахпыт диэн билэр этибит. Билиҥҥи таһыммыт хайдаҕа биллэр. Хамаандабыт улахан аҥаара эдэр оҕолор. Кинилэр ааттаах-суоллаах, үрдүк кылаастаах тустууктар илиилэрин-атахтарын билэн, уопут ылыннахтара диэн биһиги эрэнэбит.
Иккиһинэн, күүстээх тустууктарбыт атын дойдуга легионердыы барбыттара биллэр. Онон, өрөспүүбүлүкэ уопсай састааба мөлтөөтө. Ол эрээри, эрэл кыымын саҕар уолаттар билигин да бааллар. Тус бэйэм көрүүбүнэн, Петр Константинов, Айаал Белолюбскай куһаҕана суох өйдөбүлү хааллардылар.
Билигин чөмпүйэнээт кэнниттэн салайааччылар, тириэньэрдэр, тустуу исписэлиистэрэ дириҥ ырытыы үлэтин ыыталлара буоллар диэн мин баҕа санаалаахпын. Онно туох түмүккэ кэлбиттэрин, хайдах быһыылаахтык салгыы үлэлииллэрин туһунан аһаҕастык дьоҥҥо-сэргэҕэ этэллэрэ буоллар, норуот ортотугар кыыһырыы-уордайыы, өйдөммөт түбэлтэ аҕыйах буолуо этэ. Хайаан даҕаны көрдөрөр-иһитиннэрэр эйгэ үлэһиттэрин, суруналыыстары ыҥыран пресс-кэмпириэнсийэни тэрийин диэн буолбакка, сабыылаах да мунньах санааларын үллэстиэххэ сөп этэ. Тириэньэрдэр нэһилиэнньэҕэ аһаҕас буолаллара буоллар, бэйэлэрин кириитикэлиир, анаалыстыыр үлэни ыыталлара буоллар диэн санаалаахпын, – Петр Павлов үллэстэр.
Виктория Бястинова, «Саха сирэ» хаһыат,
edersaas.ru
Хаартыска СИА.