Петр Павлов: “Ярыгин турнирыгар” дойду чөмпүйэнээтин түмүгүнэн сүүмэрдиэхтээхтэрэ”
Бүгүн спорт суруналыыһа Петр Павловтан Красноярскайга саҕаланар көҥүл тустууга Иван Ярыгин кэриэһигэр XXIX норуоттар икки ардыларынааҕы турнирга кыттыыга сүүмэрдээһин ыытыллыытыгар санаатын үллэстэригэр көрдөстүбүт.
—Бары билэргит курдук, Тустуу аан дойдутааҕы түмсүүтүн (UWW) быһаарыытынан, “Ярыгин турнира” быйылгыттан рейтиннээх күрэхтэһиилэр ахсааннарыгар киллэриллибитэ. Ол балаһыанньатын быһыытынан, күрэхтэһиини тэрийэн ыытар дойду ыйааһын аайы бастаан үстүү диэбиттэрэ, онтон биэстии бөҕөһү кытыннарара көҥүллэммитэ. Онно Арассыыйа сүүмэрдэммит хамаандатын кылаабынай тириэньэрэ Дзамболат Тедеев 2016 сыллааҕы Рио-де-Жанейротааҕы Олимпиада чөмпүйүөннэрэ Абдулрашид Садулаев, Сослан Рамонов, үрүҥ көмүс призера Аниуар Гедуев “Ярыгин турнирыгар” путевканы быһа ылаллар диэн иһитиннэрбитэ. Итиэннэ 2017 сыллааҕы аан дойду, Европа чөмпүйэнээттэрин кыттыылаахтара, “Аланы” турнир кыайыылаахтара киллэриллиэхтэрин эппитэ. Уонна, кыттааччы аҕыйах буоллаҕына, “Ярыгин турнирын” иннинэ ыытыллар Тустуу академиятын түһүлгэтин сүүмэрдиир күрэхтэһии курдук оҥороммут, финалистары киллэрэн биэриэхпит диэбитэ.
Ол эрээри, хас хонон турдахпыт аайы балаһыанньа былыттаах халлаанныы уларыйа турар. Кэлин испииһэккэ баар да дьону күрэхтэһиигэ киллэримиэ суох курдук түгэннэрэ буолуталаатылар. Холобура, Билял Махов хайаан да кыттар диэн этэ. Бүгүн кэлэн тустубат буолбут үһү. Аны бүгүн Гедуев икки Рамонов икки киирбэттэр диэтилэр. Сэрэйдэххэ, билигин федерацияҕа кими кытыннарар-кытыннарбат туһунан элбэх кэпсэтии, мөккүөр барар буолуохтаах. Биһиги манна олорон билбэт буоллахпыт дии.
Мин биир бэйэм итини олох сыыһа диибин. Дьиҥэр, улахан күрэхтэһии иннинэ сүүмэрдиир турниры ыытыы, бастатан туран, тустуукка охсуулаах. Кини сүүмэрдиир күрэхтэһии иннинэ ыйааһынын түһэриниэхтээх, аҕыс, сэттэ эргиир тустуохтаах, аны сүрүн күрэхтэһиитигэр эмиэ ыйааһынын үүрүөхтээх, сынньалаҥын аттарыахтаах, аһылыгын, доруобуйатын туругун көрүнүөхтээх… Ити бөҕөскө арыынан-сыанан аҕаабата биллэр.
Онон мин көрүүбэр, Арассыыйаттан ыйааһын аайы биэстии киһини, туох да эбии сүүмэрдээһини оҥорбокко, дойду чөмпүйэнээтин түмүгүнэн киллэриэхтээхтэрэ. Тедеев тута инньэ диэбитэ буоллар, туох да кэпсэтии, хос саҥа-иҥэ суох буолуо этэ. Тоҕо диэтэххэ, Арассыыйа национальнай чөмпүйэнээтэ бэйэтин таһымынан “Ярыгинтан” улахан. “Ярыгин турнирын” кыайыылаахтара аан дойду уонна Европа Кубогар кыттар быраабы ылаллар. Оттон Арассыыйа чөмпүйүөннэрэ аан дойду чөмпүйэнээтигэр сүүмэрдэнэллэр. Онон, мин санаабар, ити сыыһа дьаһаллар ылыллыбыттарын түмүгэр, билигин мөккүөр бөҕө өрө оргуйан олорор.
Аны бүгүҥҥү күҥҥэ диэри Арассыыйаттан чопчу маннык бөҕөстөр кытталлар диэн этэр кыахпыт суох. Тоҕо диэтэххэ, манна биир критерий суох, испииһэк күннэтэ уларыйа турар.
Роман Попов, “Саха сирэ” хаһыат, edersaas.ru