Петр Кушкирин: «Исидор Барахов аатынан Култуура киинин бырайыактыыр-симиэтэлиир үлэтэ түмүктэнэрэ чугаһаата»

Бүгүн Үөһээ Бүлүүгэ Олоҥхо ыһыаҕын чэрчитинэн, Харбалаахха  Исидор Барахов аатынан култуура киинин бастакы сыбаайатын түһэрии буолаары турар.

Ол туһунан СӨ Судаарыстаннай сакаас сулууспатын генеральнай дириэктэрэ Петр Кушкирин: «Исидор Барахов аатынан Култуура киинин тутуу саҕаланна. От ыйыгар бырайыактыыр-симиэтэлиир үлэтэ бүтүөхтээх. 2000 кв.м. тахса иэннээх, 2 этээстээх буолуоҕа, мусуой, киинэ тыйаатыра, 100-тэн тахса миэстэлээх аактабай саала баар буолуохтара. Харбалаах нэһилиэгин дьаһалтата бырайыагын талан, сөбүлэҥнэрин биэрэн, киини тутуу олоххо киирэн эрэриттэн биһиги да үөрэбит. Барыта отучча киһи үлэлиэлэҕэ, от ыйын ортотуттан экспертизатын ыллахпытына, уопсай куонкурус биллэриэхпит. Сыаната 186 мөл.солк. кэриҥэ буолуо, экспертизата билиннэҕинэ, сыаната чуолкайданыа. Бүгүҥҥү күҥҥэ Ил Дархан дьаһала баар, үлэни ыытарга биир бэдэрээтчити кытары үлэлииргэ диэн. Эһиил ахсынньыга бүтэрэр сорук турар, онон эрдэттэн көтүрүү, көһөрүү үлэтэ саҕаланна», — диэн иһитиннэрдэ.