Петр Гоголев: «Муус устар 27 күнэ – биһиги судаарыстыбаннай бырааһынньыкпыт»
Ытыктабыллаах биир дойдулаахтарым! Күндү доҕоттор!
Саха Өрөспүүбүлүкэтин Ил Түмэнин аатыттан бар дьоммун Өрөспүүбүлүкэбит күнүнэн итиитик-истиҥник эҕэрдэлиибин.
Муус устар 27 күнэ – биһиги судаарыстыбаннай бырааһынньыкпыт. Бары билэрбит курдук, 1922 сыллаахха муус устар 27 күнүгэр Саха сирэ автономияны ылыммыта, онтон ыла бу күнү Саха Өрөспүүбүлүкэтигэр олорор, үлэлиир дьон бука бары Өрөспүүбүлүкэ күнүн быһыытынан билинэбит. Аны икки сылынан Саха сирин бары олохтоохторо бу бэлиэ күн 100 сылын көрсүөхпүт.
Бүгүн Саха сирин дьоно-сэргэтэ, эдэр ыччат биллиилээх судаарыстыбаннай уонна уопсастыбаннай диэйэтэллэр Максим Аммосов, Былатыан Ойуунускай, Исидор Барахов, Степан Аржаков уонна кинилэри кытта Саха сирэ автономнай өрөспүүбүлүкэ буоларын ситиспит, үгүс сыраларын уурбут дьоммут үтүө ааттарын кэриэстиир, сүгүрүйэрбитин, махтанарбытын биллэрэр күммүт. Саха сирэ автономияны ситиһиитэ Уһук Хоту дойду олохтоохторун олохторо-дьаһахтара тупсуутугар олугу уурбута. Ол курдук, Саха сиригэр бырамыысыланнас, тыа хаһаайыстыбата, доруобуйа харыстабыла, үөрэх, наука, култуура күүскэ сайдан, кэҥээн барбыттара.
Оттон өрөспүүбүлүкэ саҥа историятыттан сэгэттэххэ, Саха Өрөспүүбүлүкэтин уон иккис ыҥырыылаах Үрдүкү Сэбиэтин уочарата суох 1992 сыл муус устар 27 күнүнээҕи сессиятыгар Саха Өрөспүүбүлүкэтин билиҥҥи Конституцията (Төрүт Сокуона) үлэҕэ киирбитэ. Мантан ыла судаарыстыбаннас сайдыытын саҥа кэрдиииһэ саҕаламмыта, өрөспүүбүлүкэ үп-харчы-экэниэмикэ өттүнэн төрүтэ, конституционнай-правовой тиһигэ олохтоммута.
Муус устар 27 күнэ өссө Арассыыйа парламентаризмын күнүнэн билиниллэр.
Бүгүҥҥү бырааһынньыгы биһиги ураты усулуобуйа кэмигэр көрүстүбүт. Коронавирус диэн ааттанар сыстыганнаах ыарыы өрөспүүбүлүкэбитигэр күүскэ тарҕамматын инниттэн үгүспүт дьиэбитигэр бүгэн олоробут. Онон түгэнинэн туһанан, биир дойдулаахтарбар бэйэҕит уонна чугас дьоҥҥут иннигэр эппиэтинэстээх сыһыаҥҥыт иһин махтаныахпын баҕарабын. Бу быыһык кэми санаабыт күүһүнэн, бэйэ-бэйэбитигэр харыстабыллаах сыһыаммытынан этэҥҥэ туоруохпут диэн эрэнэбин.
Саха Өрөспүүбүлүкэтин Ил Түмэнин
Бэрэссэдээтэлэ П.В. Гоголев.