Петр Габышев: “Технопаарка – үүнэн турар мас, оттон IT-паарка – лабаата
![](https://edersaas.ru/wp-content/uploads/2019/02/SHE_0413-1.jpg)
Технопаарка дириэктэрин э.т. Петр Габышев СИА-ҕа интервью биэрбитэ. Манна сүрүннээн Казахстаҥҥа ыытыллыбыт Демо күн, олоххо киллэриллэр бырайыактар уонна соторутааҕыта аһыллыбыт IT-паарка туһунан кэпсэттилэр.
Казахстантан биир идэлээхтэрин ыҥырыыларынан Технопаарка резиденэ Николай Потапов Демо-ҕа бэйэтин бырайыагын билиһиннэрдэ, бу түмүгүнэн Казахстан хампаанньаларыгар 100 экземпляры биэрэргэ хантыраакка илии баттастылар. Олунньу 4 күнүгэр Астанаҕа “Нурсултан Назарбаев” норуоттар икки ардыларынааҕы аэропорка дьиэни хомуйар роботу көрдөрүөхтэрэ. Бу Саха сирин айан оҥорооччуларын бастакы ситиһиилэрэ. Билигин “Автономнай технологиялар” иннилэригэр маны маассабайдык оҥорон, аан дойду ырыынагын баһылааһын күүтэр.
Кулун тутар 5-6 күннэригэр IT-паарка баазатыгар Цифровой регион Open Innovations Startup Tour стартаптарыгар куонкурус ыытыллыаҕа. Кыттааччылар 300 тыһыынча солкуоубай сүрүн бирииһи ылар туһугар күрэстэһиэхтэрэ, ону тэҥэ Сколково фондатын партнердарын бырагыраамаларыгар кыттар кыахтаныахтара. Ити стартаптарын сайыннаралларыгар төһүү буолуоҕа. Былырыын 260 сайаапка киирбитэ, быйыл кыттааччы ахсаана элбиирэ күүтүллэр.
Петр Габышев атыылаһыыга тохтоон, барыта сокуоҥҥа олоҕурарын бэлиэтээтэ. “Биһиги Антимонопольнай федеральнай сулууспа управлениетыгар, өрөспүүбүлүкэ Счетнай палаататыгар ирдэнэр бэрэбиэркэлэри ааһабыт. Бары сметалар бэрэбиэркэлэннилэр, — диэтэ кини. – 223 Федеральнай сокуоҥҥа олоҕуран биир хааччыйааччыттан атыылаһыы кэһии буолбатах.
Кэпсэтии кэмигэр Петр Технопаарканы тииккэ, оттон IT-ны лабааҕа холоото. Онон Технопаарка уонна IT биир соруктаахтар – стартаптары өйөөһүн. Өскөтүн Технопаарка араас хайысхаларынан дьарыктанар буоллаҕына, IT-паарка үрдүк технологияларга үлэлээччилэргэ туһуланар.
Сотору кэминэн В8 – “Якутия” венчурнай хампаанньаны кытта холбоһуктаах фонданы арыйыахтара. Ити стартаптарга үбүнэн көмөлөһүөҕэ, айан оҥорооччуларга инвестордары буан биэриэҕэ. Ону тэҥэ Казахстаннааҕы Techgarde акселераторы кытта бииргэ үлэлиир баҕалаахтар.
edersaas.ru