Петр Федоров: «Үлэни тэрийиигэ сонун ньыманы баһылаабыппыт»
1975 сыл сэтинньи 11 күнүгэр Нерюнгри бөһүөлэгэр баартыйа салайааччыларын улахан бөлөҕө кэлбитэ.
edersaas.ru
Бу Саха сирин оройуоннарыттан талыллан кэлбит уопуттаах, дьону көҕүлүүр партийнай үлэһиттэр этэ. Кинилэр кылгас кэм иһигэр Нерюнгритээҕи таас чох комплексын, БАМ тутааччыларын олохторун уонна үлэлиир усулуобуйаларын тэрийиэхтээхтэрэ. Суолталаах соругу толорууга анаан кэлбит салайааччылар ортолоругар Өймөкөөн оройуонуттан ыҥырыллан кэлбит баартыйа райкомун 2-c сэкирэтээрэ Петр Федоров эмиэ баара.
— Күн аайы дойду араас өрөспүүбүлүкэлэриттэн ыччаттар этэрээттэрэ кэлэ турара. Кинилэри барыларын олохтуохха, аһатыахха, үлэнэн хааччыйыахха наада этэ. Олорор дьиэ тиийбэт буолан, икки кыһыны быһа ыччаттар армейскай балааккаларга олорбуттара. Килиэп тиийбэт кыһалҕата, киһи элбэҕэ бэрт буолан, үгүс дьон матан хаалар этэ. Ол иһин Дьокуускайтан сөмөлүөтүнэн, Алдантан икки-үс массыынанан тастарарбыт. Оҕолорго үүт ас суох буолан, үүт ас бородууксуйатын «ЯК-40» сөмөлүөтүнэн Благовещенскай куораттан аҕаларбыт. Уон сылы быһа итинник дьоммутун аһатан олорбуппут.
Бу сылларга үлэни тэрийиигэ сонун ньыманы баһылаабыппыт. Ол курдук, сарсыардаттан үлэ нэдиэлэтин «партийнай планеркалартан» саҕалыыр буолбуппут. Хас биирдии тутуу биригээдэтин салайааччылара бэйэлэрин үлэлиир учаастактарыгар нэдиэлэтээҕи былааннарын ылыналлара уонна ол туолуутун кэлэр планеркаҕа отчуоттууллара. Онон үлэ хаамыыта биллэ тэтимирбитэ. Кэбиниэккэ олорон дьаһайбаккын, бары тутуу ыытыллар учаастактарыгар сылдьан үлэ хаамыытын кэтиирбит. Түөрт сылынан үлэ түмүгүн көрөн баран, ССКП Киин Кэмитиэтэ үлэбит бу көрүҥүн биһирээбитэ уонна бары партийнай салааларга биһиги ньымабытын туһанарга мэктиэлээбитэ. Ити курдук үлэлээн, биһиги чох комплексын болдьоҕун иннинэ тутан киллэрбиппит. Онон мин олоҕум саамай үтүө кэмнэрэ БАМ, Нерюнгри куорат курдук бөдөҥ тутуулар саамай үгэннэригэр ааспыт буолан, бэйэбин олус дьоллоох киһинэн ааҕынабын, — диэн кэпсиир күн бүгүҥҥэ диэри дьон махтана ахтар салайааччыта Петр Федоров.
Бастакы пассажирскай пуойаһынан бочуоттаах айаннааччы, Нерюнгри куорат тутуутугар үлэлээбит, БАМ уонна АЯМ тутааччыларын олохторун-дьаһахтарын салайыыга тэрийэр үлэни ыыппыт, ССКП Нерюнгритээҕи горкомун иккис сэкирэтээрэ, Үлэ Кыһыл Знамятын уордьан кавалера, норуот хаһаайыстыбатын үтүөлээх үлэһитэ Петр Федоров доҕотторун кытта көрсөн санаалыын көнньүөрдэ, дууһалыын сырдаата.
Петр Семенович курдук норуокка чугас салайааччылары дьон өрүү сыаналыыр, үрдүктүк тутар уонна киэн туттар.
Елена ПОТОЦКАЯ, «Саха сирэ»хаһыат, edersaas.ru
Ааптар хаартыскаҕа түһэриитэ.