«Туймаада» ФАПК генеральнай дириэктэрэ Петр Ефремов Ил Дархан Анал этиитигэр санаатын үллэһиннэ.
—Ил Дархан Анал этиитигэр кэлэр сылы Доруобуйа сылынан биллэрдэ. Бу саамай сөптөөх уонна наадалаах быһаарыныы. Мин санаабар, кэлэр сыл уопсастыба ханнык баҕарар араҥатын таарыйыаҕа: успуорт, үөрэх, тыа хаһаайыстыбата уонна духуобунай сайдыы.
Холобур, Доруобуйа сыла тыа хаһаайыстыбатын нэһилиэнньэни бэйэ оҥорон таһаарар аһылыгынан хааччыйарыгар туһаайыаҕа. Кэлэр сыл оҕолор оскуолаҕа уонна уһуйааҥҥа аһыыр аһылыктарын хаачыстыбатын үрдэтиэҕэ.
Ил Дархан тыа сирин сайдыытыгар улахан болҕомтотун уурар. Мантан ыла, тыа дьонун дьарыктаах буолуута улуус баһылыктарын үлэлэрин өссө биир эппиэтинэһинэн буолуоҕа. Маны таһынан, Ил Дархан эт, үүт, туорах, хортуоска уонна оҕуруот аһын оҥорон таһаарыытыгар анал сорудахтары биэрдэ. Маны ситиһэргэ биһиги тэрилтэбит, “Туймаада” ФАПК үлэтин, күүһүн туһаныахха наада.
Саха киһитэ буоларым быһыытынан, Айсен Сергеевич Дьокуускайга Саха норуотун духуобунай-култуурунай үгэстэрин киинин тутарга диэн иһитиннэриитин үөрэ иһиттим.
СӨ Ил Дархан уонна Бырабыыталыстыба пресс-сулууспата