Оҕо суруйааччыта Петр Дмитриев – Туутугу кытары бырастыылаһыы

Биллиилээх оҕо суруйааччыта, фольклорист, тылбаасчыт, СӨ култууратын үтүөлээх үлэһитэ, Арассыыйа наукатын академиятын Сибиирдээҕи отделениетын үтүөлээх бэтэрээнэ Петр Никифорович Дмитриев – Туутук бу дьыл сэтинньи 2 күнүгэр 80 сааһыгар биһиги кэккэбититтэн туораата.

Петр Дмитриев – Туутук оҕо литературатын курдук уустук жанрга ылсан үлэлээбитэ. Кини хоһоонноро оскуола иннинээҕи саастаах оҕолор хрестоматияларыгар, кылаас таһынан ааҕыы учебниктарыгар киирбиттэрэ. Тэрийэр, айар үлэҕэ талааннааҕа эдэриттэн биллибитэ. Ол да иһин хомсомуолга үлэлээн, кэлин төрөөбүт улууһугар Мэҥэ Хаҥаласка оскуолаҕа дириэктэрдээн дьону-сэргэни түмэ тардар ураты дьоҕурун көрдөрбүтэ.
Кини 1972 с. саҕалаан Гуманитарнай чинчийии институтугар үлэлээбитэ. Петр Никифорович – айылҕаттан талааннаах, дэгиттэр фольклорист, хомуйааччы этэ. Кини олоҥхо 30 толору тиэкиһин аудиозапиһын оҥорторбута. Бу оҥорбут үлэтинэн П.П.Ядрихинскай “Дьырыбына Дьырылыаттата”, Н.П.Бурнашов “Кыыс Дэбилийэтэ”, Н.И.Степанов-Ноорой “Күн эрилитэ”, о.д.а. олоҥхолор ааҕааччы киэҥ араҥатыгар тахсыбыттара. Бу олоҥхолору уһуларыгар кини аныгы техническэй сириэстибэлэринэн туһаммыт буолан, устуута быдан хаачыстыбалаах этэ. Онон наука эйгэтигэр биир сүҥкэн кылаатын киллэрсибитэ.
Петр Никифорович бэйэтэ ааттаах үчүгэй ырыаһыт, олоҥхоһут этэ. Норуот ырыаларын, олоҥхолору толороро. Ону сэргэ хаартыскаҕа түһэрэрин сөбүлүүрэ. Саха сирин суруйааччыларын араас кэмҥэ түһэрбит хаартыскалара билигин историческай суолталара улахан.
Петр Дмитриев тапталлаах кэргэн, үс оҕо амарах аҕата, үгүс сиэн эһэтэ. Кэргэнинээн ССРС норуодунай артыыһынаан Анегина Егоровна Ильинаны-Дмитриеваны кытары үс кыыстаахтар. Анегина Егоровна айар үлэтигэр Петр Никифорович кырата суох өҥөлөөх. Ол курдук, кини айар командировкаларыгар, гастролларыгар, куонкурустарыгар төһүү күүс буолбута. Дмитриевтар дьиэ кэргэн үгүс доҕоттордоохторунан биллэллэр. Бу соторутааҕыта Петр Никифорович саҥа кинигэтин таһаартаран, чугас аймахтарыгар, доҕотторугар сүрэхтээтилэр. Кэргэнэ Анегина Егоровна, оҕолоро аҕаларын тиһэх күнүгэр диэри ыарыылаатылар. Петр Никифорович чугас дьонун ортотугар, тапталга, сылаас сыһыаҥҥа уйдаран барда…
Петр Дмитриевы кытары бырастыылаһыы сарсын, сэтинньи 6 күнүгэр “Некрополь” траурнай саалаҕа (Сэргэлээх шоссетын 5 км, 28) күнүс 12 чаастан буолуоҕа.

Саха сирин суруйааччыларын сойууһун пресс-сулууспата.