Сүрүн Уопсастыба

Петр Черкашин: «Анал эпэрээссийэ кыттыылаахтарын кытта билсэбит»

Иван Петрович Черкашин  — бойобуой дьайыыларга сылдьыбыт уолаттар ассоциацияларын бэрэссэдээтэлэ.

edersaas.ru

— Биһиги ассоциациябыт араас түмсүүлэртэн турар. Ол курдук, Дьокуускай куоракка уопсайа уонча түмсүү баар. Ону таһынан 32 улууска үлэлииллэр. Ассоциацияҕа саастарыттан тутулуга суох, Украинаттан кэлбит уолаттар эмиэ киирэллэр.
Билигин Украина балаһыанньатын, сорох өттүнэн ыллахха, кистэлэҥҥэ тутар курдуктар. Ол гынан баран, аһаҕастык эттэххэ, Саха сириттэн аҕыйаҕа суох киһи сылдьар диэн этиэххэ сөп. Кинилэргэ көмөлөһөн, сүнньүнэн мантан чугас соҕус суһал ыстаап тэрилиннэ. Онуоха саха уолаттарын хантарааҕынан буолбакка, бэйэлэрин сүбэлэҥнэрин ылан баҕа өттүнэн баралларын курдук анал батальон тэриллэн эрэр. Онно ассоциация чилиэннэрэ ыкса ылсан үлэлээн эрэллэр. Биһиги баҕабыт биир: анал эпэрээссийэҕэ  оскуоланы саҥа бүтэрбит эбэтэр үөрэх кыһаларыгар үөрэнэ сылдьар ыччаттар буолбакка, ааспыт сылларга сэриигэ сылдьыбыт, өйдөрүн-төйдөрүн туппут уолаттар бараллара ордук. Ол инниттэн биһиги сөбүлэҥ ыламмыт, ыкса үлэлэһэн эрэбит.

Бэйэм эдэр сылдьан Черноморскай флокка сулууспалаабытым, сүнньүнэн Средиземнай муораҕа алтыс американскай флоту харабыллыыр этибит. Ону тэҥэ 1980-с сыллар ортолоругар Сирия, Ливия, Ливан өттүгэр сэриилэр буола тураллара. Онтон кэлин Чечня хампаанньаларыгар сылдьыбытым.
Ассоциациябытыгар күннэтэ эрийэн ыйыталаһаллар эбэтэр кэлэн көрсөллөр. Ол иһин, уора-көстө анараа барбыт уолаттар хайдах сылдьалларын билсэбит-көрсөбүт. Бырааттаргытын, доҕотторгутун хайдах сылдьалларын билэн-көрөн кэлиҥ диэн, ассоциация 4 уолун ыыта сылдьыбыппыт. Кинилэр кэлэн баран отчуоттаабыттара, иккитэ телевидение биэриилэригэр кыттыбыттара.

«Саха сирэ», edersaas.ru

0
0
Telegram @edersaas20