Петр Баснаев — СӨ норуодунай артыыһа!

Ааптар: 
Бөлөххө киир:

СӨ Ил Дархана Айсен Николаев «СӨ судаарыстыбаннай наҕараадаларынан наҕараадалыыр туһунан» ыйааҕар култуура уонна искусство эйгэтигэр Былатыан Ойуунускай аатынан Саха академическай тыйаатырын артыыһа Петр Баснаевка «Саха Өрөспүүбүлүкэтин норуодунай артыыһа» бочуоттаах ааты иҥэрэр туһунан илии баттаата.

Петр Баснаев Алексеевскай оройуон Боробул сэлиэнньэтигэр күн сирин көрбүтэ. М.С. Щепкин аатынан Үрдүкү тыйаатыр училищетыгар үөрэнэн драматическай тыйаатыр уонна киинэ артыыһын идэтин ылбыта. 1985 с. үөрэҕин бүтэриэҕиттэн күн бүгүнүгэр диэри Былатыан Ойуунускай аатынан саха академическай тыйаатырыгар үлэлии сылдьар.

Режиссер Сергей Потапов  туруорбут «Макбет» испэктээгэр Макбет оруолун толорон, «Көмүс мааска» Россиятааҕы национальнай бириэмийэҕэ «Бастыҥ эр киһи оруола» анал аакка киирсибитэ.

2003 с. Николай Лугинов «Кустук» кэпсээнинэн испэктээк туруоран, режиссер быһыытынан холоммута.

Саха дьонун болҕомтотун таппыт «Сэттээх сир» бастакы кутталлаах киинэҕэ сүрүн оруолу,  «Государственные дети»о.д.а киинэлэргэ уһуллубута.

Тыйаатыр сыанатыгар үгүс уобарастары арыйбыт артыыс  «Кээрэкээн ойуун» испэктээккэ Байаҕантай кырдьаҕаһын, «Тэпсиллибэт үтүө аат» испэктээккэ Сэмэн Даниловы, «Кус көҥүлүгэр» Тойон Ли о.д.а элбэх оруолу оонньообута даҕаны, оонньуур даҕаны. Үгүс классик суруйааччылар айымньыларынан турбут испэктээкиллэргэ, тыйаатыр сыанатыгар ойуун уобараһын итэҕэтиилээхтик арыйар. Олус табыллан оонньообут оруолларыттан биирдэстэрэ «Учуутал» испэктээккэ Алексеев оруола буолар диэтэхпинэ бука сыыспатым буолуо.

Надежда Ильина, edersaas.ru

Хаартыскалар Саха тыйаатырын инстаграм страницатыттан ылылыннылар.

+1
0
+1
0
+1
0
+1
0
+1
0
+1
0
+1
0