Пестицид, агрохимикат эргиирин федеральнай судаарыстыбаннай иһитиннэрэр систиэмэтигэр киирэргэ сайаапка хомуйуллар
Агрохимикат уонна пестицид эргиирин олохтуур хаһаайыстыбаннай субьектар испииһэктэригэр киирэргэ хаһаайыстыбалартан сайаапкалары тутуу бара турар.
Россельхознадзор Саха сиринээҕи салаата от ыйын 1 күнүттэн саҕалаан, пестицид уонна агрохимикат эргиирин хонтуруоллуур сыалтан, биирдиилээн дьонтон, юридическай сирэйдэртэн, урбаанньыттартан пестицид уонна агрохимикат эргиирин федеральнай судаарыстыбаннай иһитиннэрэр систиэмэтигэр (ФГИС ППА) киирэргэ сайаапка хомуйар. Сайаапканы пестициды уонна агрохимикаты туттар, атыылыыр, өр кэмнэ харайар, туһанар, утилизациялыыр хаһаайыстыбалар толороллор.
Кэлэр сылтан федеральнай судаарыстыбаннай иһитиннэрэр систиэмэ иһинэн пестицид уонна агрохимикат хайдах, ханна оҥоһуллан, хайдах айанныыра, хаһан, кимиэхэ атыыланара, туттуллара барыта дьэҥкэтик көрдөрүллэр буолуохтаах. Бу дьон-сэргэ, хаһаайыстыбалар сымыйа, киһи доруобуйатыгар буортулаах, аналынан көдьүүһэ суох пестицидтэри уонна агрохимикаттары ылбаттарын туһугар, кинилэр үүннэрбит оҕуруоттарын аһа сүлүһүнэ суох буоларыгар ананар дьаһал. Систиэмэни олоххо киллэриини, салайыыны уонна саҥардан иһиини Россельхознадзор хонтуруоллуур. Сайаапкалар формалара Россельхознадзор Саха сиринээҕи салаатын сайтыгар http://rsn.ykt.ru/ “образцы заявлений” салааҕа бааллар. Манна киирэн, сайаапканы толорон, zemsakha@mail.ru электроннай аадырыска ыытыллар.
Полина Громова, Россельхознадзор Саха сиринээҕи салаатын сири кэтээн көрүү отделын начальнигын солбуйааччы