Перинатальнай киинтэн бүгүн кыһыл оҕолору үөрүүлээх быһыыга-майгыга дьиэлэригэр таһаардылар
Бүгүн Дьокуускайга, перинатальнай кииҥҥэ ураты бэлиэ күн буолла. Саҥа төрөөбүт кыһыл оҕолор төрөөбүттэрин туһунан туоһу суруктарын, өрөспүүбүлүкэ салалтатыттан бэлэхтэри төрөппүттэригэр үөрүүлээх быһыыга-майгыга туттардылар. Онон бүгүн 11 уол уонна 6 кыыс алаһа дьиэлэригэр таҕыстылар.
Үөрүүлээх тэрээһиҥҥэ СӨ бырабыыталыстыбатын бэрэссэдээтэлин солбуйааччы Алексей Дьячковскай, «Россия ийэлэрэ» бүтүн Россиятааҕы уопсастыбаннай хамсааһын Саха сиринээҕи салаатын бэрэссэдээтэлэ Прасковья Борисова, СӨ доруобуйа харыстабылын миниистирин бастакы солбуйааччы Олег Припузов, 1 №-дээх өрөспүүбүлүкэтээҕи балыыһа — Национальнай медицина киинин генеральнай дириэктэрин солбуйааччы Ирина Петрова кыттыыны ыллылар.
Перинатальнай киин быйыл саас аһыллыбыта итиэннэ кулун тутар 12 күнүгэр номнуо бастакы оҕо манна төрөөбүтэ. Аҕыйах ый буолаат, тыһыынча оҕо бу иэримэ дьиэҕэ төрөөбүтүн туһунан үөрүүлээх сонун иһиллибитэ. Онтон бүгүн манна номнуо 1309 дьахтар оҕоломмут.
—Биһиги өрөспүүбүлүкэбитигэр ийэ уонна оҕо доруобуйатын харыстабылыгар улахан болҕомто ууруллар. Бу перинатальнай киин ону бигэргэтэр. Маныаха манна куорат эрэ олохтоохторо буолбакка, Саха сирин хайа баҕарар муннугуттан кэлэн оҕолонор, кырачааҥҥа күн сирин көрдөрөр кыахтаахтар. Бу дьиэҕэ үрдүк таһымнаах медицинэ өҥөтө оҥоһуллар, — диэтэ Алексей Дьячковскай. Ийэлэргэ сибэкки дьөрбөлөрүн, үрүҥ көмүс харысхаллары уонна оҕо таҥаһын-сабын кэмпилиэгин туттартаата.
Прасковья Борисова Оҕо көмүскэлин күнүнэн, саамай сырдык, кэрэ бырааһынньыгынан эҕэрдэлээтэ. Былырыын РФ бэрэсидьиэнэ Владимир Путин ыйааҕынан 2018–2027 сыллар Оҕо-аймах сылларынан биллэриллибиттэрин ыйда. Оҕону таптыырга, кини доруобай, чэгиэн, эргиччи сайдыылаах буоларын туһугар бары кыһамньыларын ууралларыгар баҕарда.
Артемий Грошев (СИА) хаартыскалара.