Кэнники сылларга өрөспүүбүлүкэ оскуолаларыгар бизнес-инкубатордар тэриллэн, оҕолор предпринимательство эйгэтигэр олус кимиилээхтик ылсан эрэллэрин бэлиэтиэххэ сөп.
edersaas.ru
Ол туоһутунан оскуола оҕолорун бизнес-инкубатордара VII өрөспүүбүлүкэтээҕи оскуола оҕолорун предпринимательствоҕа аналлаах олимпиадаларын иһинэн ыытыллар АЧЧЫГЫЙ БИЗНЕС-ЭКСПО быыстапкалара буолла.
Ахсынньы саҥатыгар ыытыллыбыт тэрээһин кэмигэр «Полярная звезда» гостиница икки этээһин көрүдүөрэ кыттааччы элбэҕэ бэрт буолан, мэктиэтигэр, олус кыараан хаалбыт көрүҥнэммитэ. Манна туох суоҕай? Эт-үүт, балык астан саҕалаан, мастан оҥоһукка, эмтээх окко, утуйар таҥас табыгар, сувенир оҥоһуктарга тиийэ баара. Мин бэрт элбэх оҕоттон ала чуо талан, ыраах улуустартан кэлбит оҕолору кытта анаан көрсөн кэпсэппитим.
Муома улууһун Улахан Чыыстайыттан сылдьар 9-с кылаас үөрэнээччитэ Галя Гагиева пельмен астыыр бэйэ дьыалатын тэриммит. Үөрэнэр оскуолата агрофилированнай буолан, кыыс ас астааһынын эйгэтин талбыт.
— Пельмеммин таба этиттэн астыыбын. Фарш оҥорор эппин дьонум олохтоох табаһыттартан атыылаһаллар. Пельмен астыыр олус наадалаах үлэ көрүҥэ эбит. Киһи үксэ астанар бокуойа суох. Онон пельменим атыыга хамаҕатык барар. Оттон бырааһынньыктарга мааны ас буолан, бокуойум олох суох буолар, — диэн кэпсиир Галя. Онон буолаары турар Саҥа дьыл бырааһынньыгар Галя кыыс түбүккэ түһэ сылдьар буолуохтаах.
Галя быыстапкаҕа кыттаары Муома курдук ыраах ыраах сиртэн соҕотоҕун айаннаан кэлбит этэ. Атаҕар саҥа туран эрэр аччыгый статустаах бизнесмен улахан киһилии дуоспуруннаахтык:
— Бу сыана ыараханыгар ким миигин арыаллыы сылдьыаҕай? Куоракка эбэм олорор. Кини быыстапкаҕа кыттар аспын бэлэмнээн көмөлөстө, — диэн санаатын үллэстибитэ.
Оттон Кэбээйи улууһун Танара орто оскуолатын 8-с кылааһын үөрэнээччилэрэ Гриша Фомин уонна Ангелина Гоголева эмиэ олус туһалаах, майгыннаспат бэйэ дьыалатын тэриммиттэр. Кинилэр быыстапкаҕа кытта таарыйа, тус бырайыактарынан дакылаат бэлэмнээбиттэрин билиһиннэрдилэр.
Гриша Фомин иллэҥ кэмигэр аҕатын кытта бултуур уонна балыктыыр эбит. Байанайа биэрбитин уол ууруна сылдьан атыылаан, харчы киллэринэр. Былаана үгүс — булт тэрилин, балаакка атыылаһан, кадровай булчут буолар санаалаах. Арааһа, идэтин эмиэ айылҕаны сыһыаннаах гына талара буолуо.
Мин кинилиин кэпсэтэр кэммэр аҕатын кытта сылдьан быйыл күһүн балыктаабыт балыгын атыылыы турара. «Кэбээйи собото» диэн бренд бэйэтинэн тиийэн кэлбитин, куорат олохтоохторо уонна ыалдьыттара хото атыыласпыттара.
Ангелина Гоголева смузи оҥорон атыылыыр эбит. Кини быыстапкаҕа тута оҥорон биэрэн, 50 солк. атыылыы турар минньигэс смузита былдьаһыгынан барбытыттан көрдөххө, кыысчаан олус кэскиллээх дьыалаҕа ылсыбыт. Мирнэйгэ олорор эдьиийэ дьиэтигэр астанаары, Новосибирскайтан сакаастаан ылбыт тэрилин, солото суох буолан туттубакка, балтыгар ыыппыт. Оруобуна ол кэмҥэ Ангелина оскуолатыгар бизнес-инкубатор аһыллан, кыыс смузи оҥорон атыылыырга санаммыт. Билигин бары тэрээһиннэр Ангелина минньигэс смузита суох ааспаттар. Оттон Саҥа дьыл киэһэ эдэр предприниматель дьэ «күннүө турдаҕа»!
Ити курдук, оскуола оҕолоро предпринимательство салаатыгар олохтоохтук ылсан, кэнэҕэс дьоҕус бизнес эйгэтигэр эрэллээхтик хардылаан, төрөөбүт Сахаларын сирин сайыннарыыга бэйэлэрин дорҕоонноохтук ааттатар бизнесменнэр үүнэн тахсыахтара диэн эрэнэбит.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.