Пекиннээҕи норуоттар икки ардыларынааҕы искусство кэллиэһигэр сэттэ сыл устата цииркэ араас жанрдарыгар үөрэммит 19 оҕо, эксээмэннэрин ситиһиилээхтик туттаран, бу күннэргэ төрөөбүт Сахаларын сиригэр кэлбиттэрин туһунан иһитиннэрии социальнай ситимнэринэн киэҥник тарҕанна.
edersaas.ru
Кыратык быыһы сэгэтэн аастахха, 1997 сыллаахха Саха сирин араас муннуктарыттан кэлбит 400 оҕоттон сүүмэрдээн, СӨ Үөрэҕин министиэристибэтин көҕүлээһининэн, оччолорго маҥнай М.В.Мучин, кини кэнниттэн А.П.Слепцов салалталарынан СӨ Бэрэсидьиэнин иһинэн каадыры бэлэмнээһиҥҥэ уонна аттаран туруорууга департамент нөҥүө аан дойду цииркэҕэ бастыҥ оскуолатыгар – Пекиннээҕи норуоттар икки ардыларынааҕы искусство кэллиэһигэр маҥнайгы 20 оҕону үөрэтэ ыыппыттара. Ити бастакы көлүөнэ оҕолор этэ. Кинилэр кэннилэриттэн иккис көлүөнэ үөрэммитэ уонна бу аҕыйах хонуктааҕыта үһүс көлүөнэ бүтэрэн кэллэ. Үчүгэйэ диэн, үөрэхтэрэ, олорор сирдэрэ, айаннарын ороскуота барыта төлөнөр.
Үһүс көлүөнэ үөрэнээччилэр кыһыҥҥы сынньалаҥнарын кэмигэр дойдуларыгар кэлэн Саҥа Дьыллааҕы тэрээһиннэргэ, Ил Дархан үгэскэ кубулуйбут харыйатыгар кытталлар эбит. Устудьуоннуур кэмнэригэр Пекин куоракка ыытыллыбыт «InterationalArtsCompetetion «YoungTalants» («Эдэр талааннар») норуоттар икки ардыларынааҕы XI бэстибээлгэ уонна Хабаровскай куоракка буолан ааспыт Цииркэ искусствотын Уһук Илиҥҥи I бэстибээлигэр Гран-при үрдүк аатын ылбыттар.
Уус Алдан улууһун Бороҕонуттан төрүттээх Семен Афанасьев: “Биһиги Пекиҥҥэ 2013 сыллаахха тохсунньуга көппүппүт. Үөрэх биһиэхэ курдук күһүҥҥүттэн саҕаланар эрээри, визабыт табыллыбакка хойутаабыппыт. Мин оччолорго 10-с кылааска үөрэнэрим. Кыра эрдэхпиттэн спорду сэҥээрэр, цииркэ үлэһитэ буолар ыра санаалааҕым. Сайын устата кытаанах сүүмэрдээһини ааһан, 19 оҕо ахсааныгар киирэн хаалбытым. Саамай кырабыт 8 саастааҕа. Биллэн турар, этэллэрин курдук, кытайдар ирдэбиллэрэ күүстээх. Барыта чопчу эрэсииминэн. Үөрэх сарсыарда 6 чаастан саҕалаан, киэһэ тоҕус-уон чааска диэри барар”, — диэн кылгастык санаатын үллэһиннэ.
Оҕолору үөрэххэ ыытаат даҕаны, өрөспүүбүлүкэ үлэ миэстэтин бэлэмнээбитинэн барар. Маҥнайгы икки көлүөнэ бүтэрээччилэртэн күн бүгүн 45 киһи цииркэҕэ үлэлии сылдьар эбит. “Пекиннээҕи кэллиэһи быйыл бүтэрбиттэр сайынын кыратык сынньана түһээт, бары тутуспутунан биһиги цииркэбитигэр артыыһынан үлэлээн барыахтара”, — диэн Цииркэ эрэкэлээмэҕэ салаатыгар иһитиннэрдилэр.
Аан дойдуга тарбахха баттанар цииркэ оскуолатыгар ситиһиилээхтик үөрэммит 19 оҕо (үһүс көлүөнэ) туохха үөрэннэ? Ону барытын бу өрөбүлгэ, ыам ыйын 12 күнүгэр биир дойдулаахтарыгар, Саха сирин олохтоохторугар анаан отчуоттуур “Поколение NEXT III” диэн кэнсиэрдэригэр арыйыахтара. Үһүс көлүөнэ оҕолор “Көтөр копье”, “Тангар” курдук саҥа, сонун, дьону сэҥээрдэр ураты, уустук албастары көрдөрүөхтэрэ.
Людмила ПОПОВА, “Саха сирэ” хаһыат, edersaas.ru