Кыайыы дьыктаанын ситиһиилээхтик суруйбут Павел Судико Москваҕа буолар Кыайыы параадын уу хараҕынан көрөр үрдүк чиэстэннэ.
“Мин оҕо эрдэхпиттэн дойду тэбэр сүрэҕэр Кыһыл Болуоссакка саллааттар чиҥ-чиҥник үктээн хаамалларын, бойобуой тиэхиньикэлэр биир кэрчигинэн ааһалларын, көтөр ааллар халлааҥҥа Кыайыыны уруйдуулларын тутан олорон көрөр сүрэхпэр ымыы оҥостор санаалааҕым. Ол ыра санаам туоларыттан дьоллоохпун,» — диэн Павел санаатын үллэстэр.
Ити этиилэриттэн Павел хараҕа уоттанар, санаата көтөҕүллэр. Мэҥэ Хаҥалас бастыҥ ыччата хайдах бүгүҥҥү улууканнаах бырааһынньыгы уу хараҕынан көрөр умнуллубат күнэ үүннэ? Кини аан дойдуну аймаабыт иккис аан дойду сэриитин устуоруйатын оҕо эрдэҕиттэн интэриэһиргээн, анаан үөрэтэн бэйэтэ хаама сылдьар “энциклопедия” кэриэтэ. Ханнык чаас ханна сэриилэспититтэн саҕалаан, хас өйдөбүнньүк туох ис хоһоонноох оҥоһуллубутун кытта билэр. Дьэ, ол иһин да буолуо Бүтүн Арассыыйатааҕы «Кыайыы диктаныгар» дойду үрдүнэн уон бастыҥнар истэригэр киирэн параадка ыҥырыллыбыт.
Уоттаах сэрии устуоруйатын туһунан билиини тургутуу 2019 с. ыытыллыбыта, манна дойду 85 эрэгийиэниттэн, 23 тас дойдуттан 100 тыһыынчаттан тахса киһи кыттыбыта. Сорудах барыта устуоруйаҕа анаммыт буолан уустук этэ, маныаха ким саамай түргэнник таба хоруйдаабыт ол бастыҥынан ааттаммыта. Павел дьэ онон ситиһиитэ Сахабыт сирэ дойдуга бэриниилээх буолуутун уонна аҕа көлүөнэҕэ ытыктабылын туоһута диэххэ сөп. Оттон Павел бэйэтэ ХИФУ-ну бүтэрбит, тыл үөрэхтээҕэ идэлээх, Мэҥэ Хаҥалас улууһун Майа сэлиэнньэтин дьокутааттарын сүбэтин бэрэссэдээтэлэ.
Даҕатан эттэххэ, 1945 с. Москваҕа Кыһыл болуоссакка 31 тыһ. тахса сержант, саллаат чиэстээхтик ньиргитэн ааспыттара. Ол иһигэр 14 саха хорсун буойуна өрө көтөҕүллэн кыайыыны уруйдаабыта. Кинилэр ортолоругар Мэҥэ Хаҥалас Чыамайыкыттан төрүттээх Петр Дьячковскай баара. Оттон бүгүн кини биир дойдулааҕа — Павел Судико. Кыайыы суола салҕанар…
Екатерина Аммосова бэлэмнээбит матырыйаалыттан.
«Майа сонун» инстаграм страницаттан.