Павел Ксенофонтов: «Гаас ситимигэр босхо холбоммут киһи, тута гааһынан туттан киирэн барыахтаах»

Бөлөххө киир:

Бэс ыйын 1 күнүгэр Судаарыстыбаннай Дуума үһүс ааҕыыга Арассыыйа Федерациятыгар гааһынан хааччыйыы туһунан сокуонугар уларытыылары киллэриини ылынна. Сокуоҥҥа сурулларынан, гааһы учаастакка диэри тардыыга гражданнар харчы төлүө суохтаахтар.

Босхо гаастааһын туһунан Ил Түмэн дьокутаата Павел Ксенофонтов санаатын үллэһиннэ:

Босхо гаас ситимигэр холбонууга биһиги бырабыыталыстыбабыт уонна Ил Түмэн дьокутааттара бэлэмнэнии үлэтин ыыппыппыт ыраатта. Икки сыл тухары үгүс мунньаҕы тэрийэн ыыттыбыт. Дьокуускай куорат уонна өрөспүүбүлүкэ таһымыгар элбэх кэпсэтии таҕыста. Билигин киин куорат гаастааһын схематын оҥорон, бастакы түһүмэҕин бүтэрдэ. Иккис түһүмэҕин бу от ыйыгар бүтэриэхтээх. Ол кэнниттэн куорат иһинэн ханнык учаастактар, дьиэлэр хаһан, хаһыс сылга гаастаныахтаахтарын туһунан барыл ылыныллыахтаах. Ол оҥорбут барыллара өрөспүүбүлүкэ барылыгар киирэр.
Иккиһинэн, өрөспүүбүлүкэ бүддьүөтүттэн гаастааһыҥҥа үп-харчы көрүллүөхтээх. Дьиэлэргэ буолбакка, саҥа кыбаарталлары, түөлбэлэри, нэһилиэктэри, саҥа уулуссалары гаастааһыҥҥа анаан. Холобурга, Дьокуускай куорат ыллахпытына, биһиги билигин бу сылга 47 мөлүйүөн солкуобайы көрдүбүт. Кэлэр сылларга аччаабыта сүүстүү мөлүйүөнү көрүөхпүт диэн үлэлии сылдьабыт.
Ити бырагыраама үлэлээн киирэн бардаҕына, уулуссаҕа улахан диаметрдаах гаас турбалара ууруллан, ол уулуссаҕа баар учаастактар гааһынан хааччыллар кыахтаныахтара.
Үсүһүнэн, босхо холбооһуҥҥа биһиги тарыыпка анал надбавка оҥоруохтаахпыт. Анал надбавка биллэн турар, гаастааһын схематыгар бырагыраама быһыытынан онно көрүллүөхтээх. Оччоҕуна биһиги анал надбавка нөҥүө тарыыпка үп-харчы көрдөхпүтүнэ, холобур, куоракка аччаабыта 60-80-ча мөлүйүөн эбии харчы көрүллэр. Бу уулуссаттан тардыллыбыт ситимтэн дьиэлэригэр диэри стояк тардарга. Манна биһиги биири өйдүөхтээхпит. Бу босхо холбооһун дьоҥҥо эрэ ананар. Тэрилтэлэргэ анаммат. Олорго атын туспа бырайыагынан, туспа хайысханан үбүлээһин көрүллүөхтээх.
Манна өссө биири тоһоҕолоон этиэм этэ. Аны гаас ситимигэр босхо холбоммут киһи, сыл иһинэн гааһынан туттан киирэн барыахтаах. Оннук ирдэбил эмиэ баар буолуоҕа.
Саха сирэ, дьиҥэр эттэххэ, гаастааһын өттүтүгэр үгүс эрэгийиэннэртэн инники сылдьар. Биһиги ааспыт үйэ 90-с сылларыттан саҕалаан бэйэбит барыл ылынан, бэйэбит үбүлээһиммитинэн элбэх үлэни ыыттыбыт. 30-40-ча миллиард харчы көрүллэн, тыа сиригэр гаастааһын хото ыытылынна.

edersaas.ru

+1
0
+1
0
+1
0
+1
0
+1
0
+1
0
+1
0