Бүгүн СӨ судаарыстыбаннай тутуу уонна олорор дьиэ надзорун управлениетын салайааччы Павел Аргунов судаарыстыбаннай былаас ситэриилээх уорганнара нэһилиэнньэҕэ отчуоттарын чэрчитинэн ыытыллыбыт быһа эпииргэ кытынна.
edersaas.ru
Управление салайааччыта дьиэ-уот, коммунальнай өҥө хаачыстыбата суох оҥоһуллуннаҕына уонна тутууга туох эрэ дьиэк булулуннаҕына, төлөбүрү хос аахтарар туһунан кэпсээтэ. Куорат биир олохтооҕо олорор элбэх кыбартыыралаах дьиэтигэр итэҕэстэр булуллубуттарын туһунан эппитигэр, Павел Аргунов эбийиэк хаачыстыбатыгар модьуйуулары дьиэ туттааччыттан туруорсулларын бэлиэтээтэ. Эбийиэккэ мэктиэ болдьоҕо 5 сыллаах буолар, технологическай уонна инженернэй тэриллэргэ -– 3 сыл.
«Саҥа дьиэлэргэ олорооччулар итэҕэстэри туоратарга дьиэ туттааччыттан ирдиэхтээхтэр. Модьуйууну болҕомтоҕо ылбат эбэтэр аккаастыыр түбэлтэлэригэр суукка ирдэбил сайабылыанньаны түһэриэхтээхтэр», -– диэн быһаарда Павел Аргунов.
Ону таһынан, салайааччы быһаарбытынан, олорор дьиэлэргэ итии уу туох да биричиинэтэ суох кэлбэт буоллаҕына, салайар хампаанньа уу температуратын мээрэйдиэхтээх уонна тустаах актаны оҥоруохтаах. Өскөтүн уу температурата нуормаҕа эппиэттээбэт буоллаҕына, итии уу төлөбүрүн хос аахтарыахха сөп.
Бүгүҥҥү баһы эпиир кэмигэр колл-кииҥҥэ нэһилиэнньэттэн 128 киһи эрийдэ, боппуруостар үгүстэрэ дьиэ-уот, коммунальнай инфраструктура, сыана, суол туругар уо.д.а. сыһыаннаахтар.
Саха сирин вице-премьерэ Дмитрий Садовников быһаарбытынан, судаарыстыбаннай былаас ситэриилээх уорганнара киирбит ыйытыыларга барытыгар хоруйдуохтара.
Надежда ЕГОРОВА, «Саха сирэ» хаһыат, edersaas.ru