Павел Аргунов: «Арҕаа дойдулартан кэлэр сымыйа сурахтарга итэҕэйимиэҕиҥ!»
Арассыыйаны холуннарар аналлаах сурах-садьык, сонун социальнай ситимнэринэн өрүү тарҕанар. Олору барытын ыраас мууска ууран итэҕэйэн иһэр адьас табыллыбат. Ол туһунан биир дойдулаахтарбыт, биллэр-көстөр салайааччылар тус санааларын үллэстэллэр.
Павел Аргунов, СӨ судаарыстыбаннай тутуу уонна олорор дьиэ надзорун управлениетын салайааччы:
— НАТО Украинаны Арассыыйаҕа саба түһэр миэстэтин быһыытынан оҥостубута ыраатта. Онон РФ Бэрэсидьиэнэ Владимир Путин сөптөөх дьаһалы ылынан, анал байыаннай эпэрээссийэни саҕалаабыта саамай сөп диэн бэлиэтиибин. Тутуу хайысхатын таарыйар буоллахха, арҕаа дойдулар сааҥсыйалара ити салааны хаарыйбыта эрээри, бу күннэргэ РФ Бырабыыталыстыбатын бэрэссэдээтэлэ Михаил Мишустин сөптөөх дьаһалы ылынна. Ол курдук, бааннар тутааччыларга 15 % ставкалаах чэпчэтиилээх кирэдьиити биэриэхтэрэ. Баан ылбатах дохуотун сабарга судаарыстыбаттан субсидия көрүллэр буолла, ол ставката 7,5 %. Маннык дьаһалынан судаарыстыба бааннары уонна тутааччылары тэҥинэн өйүүр буолла. Барыта этэҥҥэ бардаҕына, билигин тутулла турар дьиэлэр үлэҕэ киириэхтэрэ. Түгэнинэн туһанан, Саха сирин ытык-мааны олохтоохторо Арассыыйа өссө күүһүрэрин туһугар бары түмсүөҕүҥ, арҕаа дойдулартан кэлэр сымыйа сурахтары, сонуннары итэҕэйимиэҕиҥ диэн ыҥырабын.
edersaas.ru