РФ Куттал суох буолуутун сэбиэтин сэкирэтээрэ Николай Патрушев Дьокуускайга баар. Бүгүҥҥү мунньахха “Мир” рудникка тахсыбыт саахал туһунан эттэ.
Аграфена КУЗЬМИНА, https://edersaas.ru
Бу маннык балаһыанньаҕа барытын хонтуруолга тутар уонна кэнэҕискитин манныгы таһаарбат туһугар үлэлэһиэххэ наадатын бэлиэтээтэ.
“Мирнэйгэ шахтаҕа тахсыбыт быһылаан туһунан информацияны киэҥник тарҕатар сириэстибэлэр нөҥүө истэ-билэ сылдьаҕыт. Егор Афанасьевичтыын кэпсэтэн баран, буолбут быһылааны хайаатар да хонтуруолга тутуохха уонна кэнэҕискитин бу маннык балаһыанньа үөскээбэтин туһугар үлэлэһиэххэ наада диэн түмүккэ кэллибит. Билигин дьону көрдөөһүн үлэтэ бара турар. Эмсэҕэлээбиттэргэ бары өттүнэн, ол иһигэр үбүнэн, көмөлөһүөхпүт”, — диэн иһитиннэрдэ мунньах кэмигэр Николай Платонович.
Санатан эттэххэ, билигин да шахтаттан аҕыс киһи булулла илик. “АЛРОСА” хампаанньа пресс-киинэ бэлиэтииринэн, шахтаҕа бу күннэргэ 200-тэн тахса миэтэрэ сири ыраастаабыттар, скалолазтары таһынан манна анал тиэхиньикэ үлэлиир. Былаан быһыытынан, көрдөөччүлэр кыалыннаҕына бүгүн дьон хаайтарбыт сиригэр тиийиэхтээхтэр. Карьер уутун таһымын анал исписэлиистэр хонтуруолга тута олороллор, ууну хачайдыырга хас да носуос үлэлиир.
Аграфена КУЗЬМИНА, https://edersaas.ru