Бүгүн, сэтинньи 20 күнүгэр, өрөспүүбүлүкэбит Ил Дархана Айсен Николаев “Биһиги – Арассыыйа кэскиллэрэбит” бырайыак туһунан Ыйаах таһаарда.
Саҥа тахсыбыт Ыйаах туһунан Чокуурдаахтан “Патриот” клууп салайааччыта Элла Рожина маннык эттэ:
— Мин быйылгыттан Аллайыаха улууһун Чокуурдаах орто оскуолатыгар “Патриот” диэн байыаннай-патриотическай кулуубу салайан үлэлэтэбин. Бу кулууп тэриллибитэ хас да сыл буолбут. “Патриот” кулуупка 8-10 кылаас үөрэнээччилэрэ баҕа өттүлэринэн сылдьаллар. Билигин уопсайа 11 оҕо дьарыктанар. Кулууппутугар байыаннай дьыаланы уонна патриотическай иитиини дьүөрэлиибит. Лидердэринэн Судакова Ангелина, Стрюков Никита, Козлов Саша буолаллар. Кинилэр миэхэ олус көмөлөһөллөр.
Дьарыкпыт кэмигэр стройунан хаамыыга, аптамааты ыһыыга-хомуйууга, араас ньымаларга курдук байыаннай үөрэхпит таһынан Чокуурдаахха уонна оскуолабытыгар ыытыллар тэрээһиннэргэ кыттабыт. Холобур, бу соторутааҕыта Аармыйаҕа ыҥырыллааччы (призывник) күнүгэр кыттыбыппытын сэргээтилэр. Кыайыы 75 сылын көрсө эмиэ былааммыт элбэх.
Оскуола үөрэнээччилэригэр патриотическай иитии күүскэ ыытылыннаҕына, Ийэ дойдубутун көмүскээччилэри иитэн таһаарыахпыт. Оҕолор бэрээдэктэрэ тупсуо. Хоту дойду оҕолоро төрөөбүт дойдуларын олус таптыыллар. Онуоха бу биһиги “Патриот” диэн кулууппут көмөлөһүөҕэ. 2020 сылга улахан форум тэриллиэ диэн ыйаахха этиллибит. Кыаллара буоллар , биһиги ити форумҥа кыттыа этибит.
Ил Дархаммыт Айсен Николаев таһаарбыт ыйааҕын учууталлар, төрөппүттэр, уопсастыбаннас даҕаны биһириэ дии саныыбын.
Женни Стрюкова.