Бүгүн Нам улууһун Партизан нэһилиэгэр «Үтүө санаа холбуката» аахсыйа-тэрээһин буолан ааста.
Бу туһунан уопсастыбаннай кэрэспэдьиэммит Полина Скрябина кэпсиир:
— Улуустааҕы култуура уонна духуобунай сайдыы управлениета биллэрбит уһулуччулаах бэлитиичэскэй уонна судаарыстыбаннай диэйэтэл Максим Аммосов төрөөбүтэ 125 сылынан, Саха АССР төрүттэммитэ 100 сылынан «100 үтүө дьыала» бачыымы өйөөн, нэһилиэкпитигэр доруобуйаларынан хааччахтаах оҕолорбутугар уонна улахан дьоммутугар анаан «Үтүө санаа холбуката» диэн аахсыйа-тэрээһини ыыттыбыт.
Нэһилиэкпитигэр 60 инбэлиит олорор. Онтон тоҕуһа — оҕолор.
Тэрээһиҥҥэ нэһилиэк тэрилтэлэрин үлэһиттэрэ бары биир киһи курдук түмсэн кыттыыны ыллылар.
Бу аахсыйа түмүгэр инбэлииттэр, доруобуйаларынан хааччахтаах дьон туһалаах бэлэх тутан, үөрүүлэрэ муҥура суох.
Тэрээһин эстафетатын биһиэхэ 1-кы Хомустах нэһилиэгэ аҕалан туттарда.
Онон аахсыйа биир күнүнэн муҥурдаммакка, биир нэдиэлэ устата тэрилтэлэринэн ыытыллыаҕа. Салгыы эстафетаны ыаллыы Никольскай нэһилиэгэр туттарыахпыт.
Ити курдук,
«Эн дьолуҥ- майгыҥ көнөтүгэр,
Эн дьолуҥ- сүрэҕиҥ үтүөтүгэр,
Эн дьолуҥ- илииҥ эрчимигэр,
Эн дьолуҥ- оҕоҥ кэскилигэр», — диэн санаанан салайтарар биир дойдулаахтарбытыгар суолталаах тэрээһиҥҥэ акытыыбынайдык кыттыбыттарыгар барҕа махталбытын тиэрдэбит.
Елена ПОТОЦКАЯ, “Саха сирэ” хаһыат, edersaas.ru
Хаартыска — Полина Скрябина тиксэриитэ.